Read turkana Ngakamatak 16 Bible Online

Ngakamatak 16 - turkana bible

Ngakamatak 16

¹Erai ngitamen ngika itwaan, nia Akuj ebunio akiroit na irotuni nakituk.

²Ngakiro daang na esubi itwaan, ejokak anakonyen keng a ilope. Ekapolon Akuj iningi ngakiro na eya lotau.

³Kilip Ekapolon Akuj topia etich kon sodi tosubakin ngakiro na ireat iyong daang.

⁴Ibore daang ni esubunit Ekapolon Akuj, eyei etich keng. Tani ngitunga luaronok esubunitae kotere akolongit na ngichan.

⁵Eremokino Ekapolon Akuj itwaan daang ni iwoga. Toyen atamar nyebuchar nyirira.

⁶Amuno ka anupit ngesi kirimakinea Akuj akisech. Itwaan ni ekerit Ekapolon Akuj, nyeanyunosi ka naaronok.

⁷Ani kejoiki Ekapolon Akuj eboyor a itwaan, isisili Ekapolon Akuj tani ngimoe a itwaan kangini ka ngesi.

⁸Ejok atingit ibore nidiochichi ni ianyuni a erot alo eriyan, akidwang atingit nikaalan tarai nimoduna.

⁹Ereat itwaan ngakiro a ngitamen keng, nakaneni Ekapolon Akuj idodeanakini ngesi na esubakini.

¹⁰Ngakiro na elimuni ekapolon, eponito ani a Akuj, nyichwanganakini akituk keng ngakiro na etiakuni.

¹¹Ngakitemiet a egielit na eriyan, ngesi esaki Ekapolon Akuj. Esaki egielit daang tarai lo eriyan.

¹²Italeo ngikapolok esubete naaronok, kainyo ateneanut ngesi itowei apolou.

¹³Italakarete ngakiro na iteni ekapolon, emina ngesi ngulu iruorosi ngakiro na iteni.

¹⁴Italakari itwaan ni eos ekapolon kainyo erukito anyunyura a ekapolon ka akitu.

¹⁵Ani elakuna ereet a ekapolon, eyei akiyar. Ikwaan ajokis keng ka ngidowon lua akiru ana ngirupei.

¹⁶Ejok noi aanyun aosou akidwang aanyun egolit. Ejok aanyun achwaanu akidwang akwangat.

¹⁷Erot lo iwapito ngitunga lu etenooko, inachari ani eyakasi naaronok. Itwaan ni echoikinit elote keng, eyuun.

¹⁸Ingareni ekinis nginyas nabo ingareni ekiwog atiyaun.

¹⁹Ejok akitiditeun kiruko ka ngikebootok, akidwang akimor ka ngikenisak ngiboro lu engataritae.

²⁰Ngini epupi na itatamio, ejokearosi ngakiro keng. Epiario ngini igieno Ekapolon Akuj.

²¹Eyenio itwaan nikooson kotere achwaanu keng. Ngakiro keng nakaabok, eminarete lu epupete.

²²Erai aosou eitanit a akiyar a ngitunga alukoosok. Erai abaangu eriras a ngikabangabangae.

²³Itamakini ekooson ngakiro keng eringa nyelimuno, tobobokis ngakiro na elimuni ngesi ngitunga.

²⁴Ikwaan ngakiro naajokak ka akimiet a ao, tobobokis etau nabo tojoikis akwaan.

²⁵ Eyei erot lo esibit anitwaan ejok tarai esal keng ngesi akitu.

²⁶Esubi itwaan etich loajokon kotere ekimue a akimuj, akook ngesi itusubi ngesi etich.

²⁷Etuk itwaan niaronon ngakiro naaronok ikwaan ngakiro keng ka akim nakariran.

²⁸Erikit itwaan niaronon eburas. Iturumi ekaswaman ngipaalon luminin.

²⁹Ingalae itwaan ni emoitana lopae keng sodi torik alorot aloaronon.

³⁰Tochoik ngitunga lu kidongete a ngakonyen ka ngangajepa, eyakasi naaronok esakete asubakin.

³¹Eraakasi ngakorwo ekiraun a ekipur, kainyo erai akiyar nikooyen ebachit alu etenooko.

³²Ejok itwaan ni nyengoana, akidwang ni eyenikinitae. Ejok itwaan ni etikokinit etau keng akidwang ni epolokinit ngirerea.

³³Erameenete ngitunga ekura toyeneta nguna esaki Akuj, nakaneni Akuj alope etiakuni.