Read turkana Ngakamatak 17 Bible Online

Ngakamatak 17 - turkana bible

Ngakamatak 17

¹Ejok akinyam amugati nakoonon tamam ngakiro kichanete, akidwang ayakau kai na imujere akimuj nakaalan kileleba ngichan.

²Epedori ekedalan lokooson apolokin lokookeng a ekapolon keng erai kesubi edia ngolo ngakiro na ngileech. Nabo irumete ekedalan ngolo ka ngide luche ebari.

³Eroyeeneo egolit ka akwangat a akim, nakaneni Ekapolon Akuj eroyi ngitai a ngitunga.

⁴Epupi ekasechan ngakiro naaronok, nabo epupi ekaliokon akituk nakamodeanan.

⁵Itwaan ni ekianar ngikebootok, iyenyi Akuj na kolong asubuni kesi. Ani kilakar iyong kotere ngichan lu eriamunit itwaan niche, nyibuchar iyong nyirira.

⁶Iwogatar ngikasukou ngide a ngide kech loger lo iwogatar ngisapa taapaakech.

⁷Nyiruorosi ngitunga lu erimae alioko, nabo emam lubaang ngakiro kayarak iruorosi.

⁸Itamito ngitunga ngiche atamar ikoni ibore ni ediakere itwaan ebata, nacha ipotorere, tosubakin na esakio.

⁹Itwaan ni erimanakini luche, eminakinio. Ngini itamuununi na esechakinitae, itadauni epaalonu.

¹⁰Itatama itwaan nikooson kotere akikilakino apei, nyitatama ekabangabangat tani keram ngaramet amiat apei.

¹¹Ikoni akitu emeanara lokamoitanan, ebuneene lotunga luaronok lu eyaunito ngichan jiik.

¹²Ejok tani akiriamun ka ebu lo edemaritae ngitak keng, akidwang akiriamun ka ekabangabangat lo esubi abaangu keng.

¹³Ani kesub itwaan ngakiro naaronok tatachak nakiro naajokak, nyedaun ngakiro naaronok anawi keng.

¹⁴Ikwaan akisiakin a eburas ka ngakipi na engaunosi, kiratak eburas nyiisiak.

¹⁵Eremokino Ekapolon Akuj itwaan ni itojokit ngitunga luaronok ka ni itoronit luajokak.

¹⁶Emam ibore eanyuni ekabangabangat erai kelemu ngaropiyae kisomaa, kainyo ebangaana ngesi.

¹⁷Idodiunit epae lo a iteni amina ngirwa daang. Idounitoe lokaatokon kingarak alochan.

¹⁸Itwaan nibaang elimuni atamar alemuni ibore, toweik ngamichae a itwaan aniche.

¹⁹Itwaan ni emina akisech, emina eburas. Itwaan ni iwoga jiik,[11] esaki nginyas.

²⁰Itwaan niaronon a akou, nyejokearosi ngakiro keng. Itwaan niaronon a akituk, elomari lochan.

²¹Isialolongi idia nibaang apakeng, nyelakar apakeng a ekabangabangat.

²²Etau lo elakara, ikwaan ka ekitoe lo itangalekini edeke, nakaneni isikarijiji ereet lo asinyit akwaan.

²³Echamuni itwaan niaronon idaidaakinio ibore nidiaket, sodi nyeetubere ngakiro eriyan.

²⁴Eriparit itwaan nikachwaan aosou, ani itwaan nibaang, itoololokinit ngakonyen wadaang.

²⁵Isialolongi idia nibaang apakeng, nabo eriebete ngakiro keng itiokeng.

²⁶Erono akisipak itwaan ni nyesechit ibore alokies, erono akirirare ngitunga lukajakaanak.

²⁷Nyingamangama itwaan nikooson jiik. Echwaana itwaan nikaalimon.

²⁸Tani ekabangabangat erai kililing, etamario kori eos. Etamario kori echwaana erai kebunaki akituk keng.