Read turkana Ngakamatak 18 Bible Online

Ngakamatak 18 - turkana bible

Ngakamatak 18

¹Itwaan ni nyepuposi ka luche, esaki ngakiro nakeng a ilope. Itopegi ngesi ngakiro nache daang na ejokak.

²Nyitee ekabangabangat ajokis a aosou, nakeng make esaki ngesi kiirarae.

³Na ebunio akisech, tolomut ngileech dang, iwapap ngileech ka etimoi.

⁴Epedorete ngakiro na elimuni itwaan aliwor eitanit a aosou. Ee robo, eliworosi eitanit lotuluk a anam, lokaalimon a ngakipi a elelea.

⁵Nyejok aminakin itwaan ni esechit, nyejok akimik ngitunga lu nyesechito ngakiro na eriyan.

⁶Eyauni akituk a ekabangabangat eburas, enyaraunit akituk keng akideto.

⁷Eyauni akituk a ekabangabangat nginyas keng a ilope. Ngakiro keng a ilope ipakarete ngesi.

⁸Ebobok ngakiro a ekaswaman ikote akimuj, ilikorosi nikajokon tolomasi nakwaan.

⁹Erai itwaan nikalany ipei ka nia nginyas.

¹⁰Ikoni Ekapolon Akuj epem lokaagongon, lo ematarosi ngitunga lu etenooko toyuunos.

¹¹Itamito ngikabarak atamar kiyuuni kesi ebarit kech loger a ngawasea anakooyak iriamito ere.

¹²Etupit amunyaro ekinis a itwaan, nakaneni nyerimae itwaan mati kitiditeun.

¹³Ani ketachu itwaan akiroit eringa nyiirara, erai abaangu ka ngileech keng.

¹⁴Itwaan ni esaki akiyar, etitinyikini edeke, nakaneni itwaan ni esurur etau, nyetitinyikini.

¹⁵Imuit itwaan nikooson akitatama, esakit akit keng akiirar ngakiro na aosou.

¹⁶Nak itwaan ni eyenikinitae ibore, ianyunosi iyong ka ngesi atipei.

¹⁷Itwaan ni isiauni kiruorik alokies, ngesi esibit iyookinit ngakiro, mati kebu eketopegan keng kingichingich.

¹⁸Ekura isalununi ngikesio, totiak ngitunga lu epegasi.

¹⁹Ikwaan akingarakin lokaatokon ka adukokin awas nakaagongon nawi kon. Ani kiburata iyong ka ngesi, kigolori ngesi iyong moding.

²⁰Ileleba akook a itwaan ngakiro na iruoro, ee robo, isimwokete ngesi ngakiro na iruoro.

²¹Nangajep itorunito akiyar ka akitu. Ngulu eminasi angajep, kitiro robo.

²²Ngini eanyuni aberu, aanyu ibore ajokon. Emina Ekapolon Akuj itwaan ngini.

²³Imaimaasi ngikebootok ilipasi, ani ngikabarak, etachuunete ngakiro a adedengu.

²⁴Eyakasi ngipaalon lu[12] nyeraakasi ngipaalon dir, nakaneni eyei epae lo emunoi iyong noi, akidwang tani lokaatokon.