Read turkana Ngakamatak 19 Bible Online

Ngakamatak 19 - turkana bible

Ngakamatak 19

¹Ejok aliwor ekebootonit, tarai lokimunoi akidwang aliwor ekabangabangat lokaliokon.

²Nyejok eyei ekimue tamam achwaanu. Itooliyori ekirikir itwaan alorot.

³Na elomarea itwaan lonyas kotere abaangu keng a ilope, tapaik Ekapolon Akuj.

⁴Iriuni ebari ngipaalon lukaalak lukiteat, nakaneni eisikini epae ekebootonit.

⁵Ekaanyunan lo iruoro alioko alokies, nyebuchar nyirira. Nyebuchar ekaliokon.

⁶Esaki itwaan daang katominak itwaan ni eyenikinitae. Eolosi itwaan daang ka itwaan ni iposi ngiboro.

⁷Itwaan nikebootonit, eremokino tani talokaatokeng. Ani bo talopae keng, nyechadarosi noi a? Tani kimaima ngesi kesi kwaai, nyebuuni.

⁸Itwaan ni eanyuni aosou, eminakina bon. Itwaan ni irichakini achwaanu, ejokearosi ngakiro keng.

⁹Itwaan ni iruoro alioko alokies, irirao, nyebuchar. Emunyario ekaliokon.

¹⁰Nyejoikinit ekabangabangat ibooyi anajako, nabo nyejoikinit ekedalan epolokinit ngikapolok.

¹¹Nyengoi itwaan nikooson atipei, na esechakinere ngesi, kiperuwa, kidodiu neni atamar erai ngesi itwaan a arimatoi.

¹²Ikwaan anyunyura a ekapolon ka akirurumare a engatuny, ikwaan amina keng ka ka ngakop, na eyakasi kidiama nginyia.

¹³Eyauni idia nibaang nginyas nika apakeng. Ikwaan aberu nakeburan ka akiru na itipitipi.

¹⁴Epedori itwaan akirum akai ka ebari anika apakeng, nakaneni nia Ekapolon Akuj eanyunea ngesi aberu nakooson.

¹⁵Takalanyaner kisaki, toper, nakaneni toyen atamar kinyami akoro.

¹⁶Itwaan ni irichakinit ngitalio a Akuj, irichakinit akiyar keng. Itwaan ni engeri, etoani.

¹⁷Ani kiinanak iyong ekebootonit ibore, ikwaan ka akitaar Ekapolon Akuj amicha. Kitachakini ngesi iyong kotere na isubi.

¹⁸Totingak ikoku kon akulit eringa edit epedori akiirar. Ani kemam, inyasunit iyong ngesi.[13]

¹⁹Itwaan ni emina anyunyura, kimiek kitir ngichan lu eyauni anyunyura ngina, kainyo ani kingarak iyong ngesi alochan kangulu, ibongokini iyong nabo akingarakin ngesi.

²⁰Kiira ngakiro nakisuruorio, tacham akitenikino. Sodi toriamunea aosou a ngirwa alu isidiyete.

²¹Elalak ngakiro na itami itwaan asubakin, nakaneni nguna esaki Ekapolon Akuj, kesi esubakinosi.

²²Amuno ngesi esakitae anitwaan, ejok ekebootonit akidwang ekaliokon.

²³Akiker Ekapolon Akuj kiteyari, kianga nyiichanyunosi ka naaronok.

²⁴Irepakini itwaan nikalany akan natubwa, tokuruwo tani abuun nakituk.

²⁵Taram itwaan nia ngimeny, sodi kitatamatar lu emam ibore eyenete. Kikilak itwaan nikachwaan, toosu.

²⁶Itwaan ni eboliar apakeng, kori kitwarak itiokeng anawi keng, eyaunit ngileech.

²⁷Lokoku, ani kijongo iyong akitatama, ilagalagakini iyong nasek iyeni.

²⁸Ekaanyunan loaronon, imenyarit ngakiro na eriyan. Ebobokinito ngakituk a ngitunga aluaronok aronis.

²⁹Ejoikinit ngikemenyak irirao, sodi kinapae ngakautoroi a ngikabangabangae.