Read turkana Ngakamatak 20 Bible Online

Ngakamatak 20 - turkana bible

Ngakamatak 20

¹Erikuni emuna ngimeny, eyauni epurot loadwaran eburas. Ebangaana itwaan ni irakari epurot.

²Anyunyura a ekapolon, ikoni akirurumare a engatuny. Itwaan ni itongoi ekapolon, ajal nginyia.

³Arimatoi ngesi achadar aloburas, nakaneni iburana ekabangabangat daang.

⁴Itwaan nikalany, nyitakini ngamanat keng ngirwa lu esakitere, emam ibore eanyuni ngirwa lua ngalemet.

⁵Ikwaan ngitamen a itwaan ka ngakipi a akar anakooyen, nakaneni epedori itwaan nikooson aokun.

⁶Ebala itwaan daang kamunoi ngesi, ekoe, eyei dir ni emunoi a?

⁷Epiaritae ngide lu etenoono apakech, tosubi na eriyan!

⁸Ekapolon lo ibooyi alokicholong a eriras, eyeni naaronok napei ingolikinea.

⁹Ngae epedori alimun tama, “Etaleu ayong etau kang, etaleun ayong anakisech kang?”

¹⁰Eremokino Ekapolon Akuj ngaratilio ka ngakitemiet a egielit na ingalaare ngitunga.

¹¹Eyenikinio tani ikoku kotere na esubeene kejokak taraakas na emunoi.

¹²Ekapolon Akuj asubuni akit nakiiraret ka akongu nakingolikinet.

¹³Ani kiminak iyong ngaju, kibootoni. Ani kituroner iyong, elalaar akimuj kon.

¹⁴Engolopa ekagielan a ibore ebala, “Erono, erono.” Ani erotokini, kinisakin ebala katubokin ngaropiyae.

¹⁵Eyei egolit, eya ngamoru nakaalak a ngaropiyae, nakaneni ekiruor a itwaan anikooson, idwangit ngiboro ngulu.

¹⁶Tolema eworu a itwaan anibaang esaa lo eweikinea amicha a itwaan a akwap anache, kiratak toliwor eweikinit amicha.

¹⁷Ejok ibore nimoduna ikoni akimuj nakaabon, ani nabo atipei, tosub engame ileleba nakituk.

¹⁸Kiira ngakiro nakisuruorio, tojokearotor ngakiro kon, nyiiloma lojie peireat ngakiro a aosou.

¹⁹Elimori ekaswaman ngamunonoe, nyiiruko nabo ka ngitunga lu iruorosi lokabangabangae.

²⁰Itwaan ni ichieni apakeng ka itiokeng, esaluni akiyar keng, loger a ataa ana edunge anaribu.

²¹Ebari lo isiakini ikirikiruunitae, esaluni emam apiaro.

²²Nyiilim tama, “Atachakini naaronok.” Kigienokin Ekapolon Akuj, kingarak.

²³Eremokino Ekapolon Akuj ngaratilio ka ngakitemiet a egielit na ingalaare ngitunga.

²⁴Ekapolon Akuj idodiuni ni itori itwaan. Ani ikokini itwaan eyeni erot keng ai?

²⁵Kitama lokojokon eringa nyelimuno atamar ilemikini Akuj akipeyos, sodi nyiiriangakin ekisidi kikong kerumor.

²⁶Eyeni ekapolon lokooson itwaan ni esechit, sodi kirira emam ngisien.

²⁷Inwakunit ataa a Ekapolon Akuj etau a itwaan,[14] iseme ngakiro na alotooma keng daang.

²⁸Erubi ekapolon erai ekapolon erai epolokinit a ngakiro ana eriyan, tarai lo emunoi, peipakarit ngitunga ngiche.

²⁹Akibuseanu a ngisorok ngesi ngikilinga kech, ani ngikasukou, ngesi ngakorwo kech.

³⁰Mati keanyu itwaan ngakiro nakaapilak ngesi etiakatar ka naaronok.