Read turkana Ngakamatak 21 Bible Online

Ngakamatak 21 - turkana bible

Ngakamatak 21

¹Eyeni Ekapolon Akuj ngakiro na esubi ekapolon loger lo eyenea ni itorete ngakipi na eleleete.

²Ejoikinito itwaan ngakiro daang na esubi, nakaneni Ekapolon Akuj itemit ngakiro na eya lotau.

³Echamit Ekapolon Akuj ateneanut ka ngakiro na eriyan akidwang akipeyos.

⁴Ngiwog ka ekinis erikito luaronok loger a ataa, eraakasi nguna akisech.

⁵Itwaan ni ereat ngakiro keng lokojokon, eanyuni ngiboro lukaalak, ani itwaan ni ekoponokin ngakiro atipei, nyeanyuni nguna itemokino.

⁶Ebari lo eanyunio kotere engalas, engopiari atipei loger a apuru, nabo kitachakak nakitu.

⁷Emunyari luaronok amoitanut kech a ngikulepek, kainyo engerito kesi akisub nguna eriyan.

⁸Erono elote a itwaan aniasechan, nakaneni etenoono elote a itwaan aniajokon.

⁹Ejok akilom naita a akai, akidwang akiruk ka aberu nakeburan alokai.

¹⁰Imuito itwaan niaronon ngakiro naaronok, nyisieni ekidunyet keng.

¹¹Nairiraare itwaan nia ngimeny, itatama itwaan nibaang. Ani kitatamikin itwaan nikooson, eanyuni achwaanu.

¹²Itee Akuj[15] na erai ngesi etenoono nguna esubasi anawi a itwaan aniaronon, nakaneni inyasuni ngesi luaronok.

¹³Itwaan ni nyiirari akigoro a ngikebootok, nyiirario ngesi dang na ikalounio.

¹⁴Ani kidaidaakin itwaan ni engoit ainakinet, edauna angoit keng. Ani kebunakin ibore nidiaket, edaun anyunyura keng.

¹⁵Na esubakinere ngakiro na eriyan, talakaros ngitunga lu etenooko, nakaneni takadakis ngitunga luaronok.

¹⁶Idarit akitu itwaan cha daang, ni inachari wache kimiek aosou.

¹⁷Ngini emina amera, ibootoni. Ngini emina emuna ka akilibilib akimuj, nyebari.

¹⁸Etachario itwaan niaronon talakakinere itwaan niajokon. Etachario itwaan ni emam anupit talakakinere ni etenoono.

¹⁹Ejok akilom nariet akidwang akiruk ka aberu nakeburan tobenyana.

²⁰Nyedaun ebari ka ajako anawi a itwaan anikooson, nakaneni irikari itwaan nibaang ebari keng napei cha eanyunea.

²¹Itwaan ni etenoono tapatana, eyari ngikaru lukaalak noi, toliwor lo erimae.

²²Epedori itwaan nikooson alemar ere, lo iyokiyete ngitunga lua ngikilinga, sodi touko ngawasea na igienosi kesi.

²³Itwaan ni echoikinit akituk keng ka angajep, nyelomari lochan.

²⁴Ngae enyaritae “ekemenyan”? Ngesi itwaan ni iwoga, kinisa. Idodiuna ngesi anakiro ana esubi.

²⁵Eari itwaan nikalany ekimue keng kainyo ewounit ngesi akisub etich.

²⁶Apaaran juui towar, irakarit ngesi etereku. Nakaneni ipotorit ni etenoono, nyewounitor.

²⁷Eremokino Ekapolon Akuj ngakipeyos a itwaan aniaronon. Eroner noi erai keyau esakea naaronok.

²⁸Nyenupio ngakiro a ekaanyunan alo nyiruoro iteni, nakaneni erubete ngakiro a itwaan ani epupi ngakiro.

²⁹Eyeni itwaan ni etenoono ngakiro keng nakaneni itingakina niaronon ajokis.

³⁰Aosou ka achwaanu, ka ngakiro na etukosi ngitunga, eraakasi pas ani a Ekapolon Akuj.

³¹Itonyounio ngangolei lojie, nakaneni erai akidwang aka Ekapolon Akuj.