Read turkana Ngakamatak 22 Bible Online

Ngakamatak 22 - turkana bible

Ngakamatak 22

¹Ejok aseun ekipur ajokon, akidwang aseun ebari lokaalan. Ejok aliwor itwaan ni kichamitae, akidwang ngaropiyae ka egolit.

²Ibore en ngesi isiriamiriamit ngikabarak ka ngikebootok, Ekapolon Akuj asubuni kesi daang.

³Ingolikini itwaan nikooson ngichan sodi totiaak. Nakaneni itwaan ni nyemisit, elomari lochan kiitok ariangakin.

⁴Ebachit a akitiditeun ka akiker Ekapolon Akuj, ngesi ebari ka arimatoi ta akiyar ngikaru lukaalak noi.

⁵Ileleba ngiikwa ka ngiloi lorotin a ngitunga aluaronok. Itwaan ni echoikina, echadar anikech.

⁶Kitatam ikoku ngakiro na ejoikinit iwapi, ani epoloe, nyetiakasi ka ngakiro nguna.

⁷Erai ekebootonit ekedalan a ekabaran, ani itwaan ni eari amicha, toliwor ekedalan a itwaan ani ipotorit amicha.

⁸Itwaan ni itae ngakiro na nyeriyan, elemi ngichan, tasalu akichiekiarit keng luche.

⁹Epiario itwaan nikapatanan kainyo emorete ka ekebootonit akimuj keng.

¹⁰Kitwarak itwaan nia ngimeny, tadaun eburas, ka angolopa ta ngiyeny.

¹¹Itwaan ni emina etau lo italeuno ka ekiruor loajokon, eelokinosi ka ekapolon.

¹²Irichakinit Ekapolon Akuj achwaanu, kitepenia ngakiro alukaliokok.

¹³Ibooyi itwaan nikalany anawi ebala, “Eyei engatuny nikalapatan! Kaario ayong kapudo!”

¹⁴Akituk a aberu anakaloman, ikoni akipany nakooyen. Itwaan ni engoikinit Ekapolon Akuj, echakakin nakipany ngina.

¹⁵Idounitere ikoku abangaanut, ani kelojakin akulit, kiter abaangu.

¹⁶Itwaan ni ichiekiarit ngikebootok esaki atamar atabarea, kori ngini ipotonokini ngikabarak ngiboro, eliwor ekebootonit.

¹⁷Todeta akit kiira ngakiro a ngikoosok. Kiseme ngakiro naketatami ayong iyong,

¹⁸kainyo ilakar iyong erai kitamuunu jiik tolimuunu.

¹⁹Kigienokin Ekapolon Akuj. Kimiek katolimok ngakiro nugu akolongit naga.

²⁰Kegirak ayong iyong ngalimuununet ngatomwon-uni, na eraakasi ngaka achwaanu ka ngakitatamet.

²¹Kitatamete iyong ngakiro na eraakasi iteni dir. Sodi ani kimeario aanyun, kirukut ka akiroit na itemokino.

²²Nyiidema ekebootonit ibore ani iboositor, kori nyiiboliar alokies ngulu emam kona ingarakinotor.

²³Kainyo eikinit Ekapolon Akuj kesi, sodi tomunya ngulu esakete amunyar kesi.

²⁴Nyiielokinosi ka itwaan nikangoan, kori lu eminasi anyunyura.

²⁵Ipedori akirokun elote kech, kisurum loger a eloit.

²⁶Wara nyiiliwor itwaan ni ibala ilemuni ibore, kori nyiiweik amicha a itwaan aniche.

²⁷Ani kipiyo iyong akitach, kidemario tani akapet kon.

²⁸Tochoite isiyotokini ekukuor longorot, lo kolong egerokinete taapaakon.

²⁹Itwaan nikunonoit alotich keng, esubi etich a ngikapolok. Meere ngitunga lu nyeyenikinitae esubanakinete ngesi etich.