Read turkana Ngakamatak 23 Bible Online

Ngakamatak 23 - turkana bible

Ngakamatak 23

¹Ani kiboikin iyong kimuja ka ekapolon, kitamunite atamar erai ngesi ngae.[16]

²Ani kimujana iyong, kiapak ekimuje.

³Wara nyikiminana akimuj keng, kainyo erai tokona ngon akingalaunet iyong.

⁴Nyiituburun kotere akisak ebari, toosu tochoikin.

⁵Epedori ebari angopiar atipei, tosub eyakasi ngabeben na epororea loger a egole.

⁶Nyiinyam akimuj a itwaan anikamonan, kori wara akimuj keng naajokon nyikimina.

⁷Elimuni ngesi tama, “Kasio kimuj.” Tarai nyikote neni alotau.

⁸Ilekuni iyong akimuj na inyam daang. Tobukoros ngakiro kon naajokak, na ibuakinitor alakara.

⁹Nyiilimok ekabangabangat ngakiro a aosou, kainyo nyejoikinete.

¹⁰Tochoite isiyotokini ekukuor longorot, kori nyiiloma namanat a ngikokiok.

¹¹Ekapolon Akuj erai ekaikinan kech loapolon. Eikini ngesi kesi anikon.

¹²Kiira ngakiro nakitatamio ka apupokin ngakiro na achwaanu.

¹³Nyiriaka akitenikin ikoku a akulit. Nyeari akulit ikoku.

¹⁴Ani kiram iyong ikoku a akulit, iyuuni ngesi anakitu.

¹⁵Lokoku, ani kiosu iyong, alakar ayong dang.

¹⁶Etamari etau kang chuu, erai kitorut ngakiro na iyookino nakituk kon.

¹⁷Wara nyikirum etereku kotere ngikasechak, pearai toker Ekapolon Akuj.

¹⁸Iteni dir ejokearosi na isidiunosi, nabo nyengopete na igieno iyong.

¹⁹Topupok lokoku, toosu, sodi kitama eger a eboyor kon.

²⁰Wara nyiiruko ka ngitunga lukamatak emuna lokaalan, kori lukadakak akiring nakaalan.

²¹Kainyo ibootoni lu irakanari emuna ka lukadakak. Ani kerai akimuj ka akiper bon isubi iyong, inapi ngakorisae atipei.

²²Kiira ngakiro a apakon alo kolong kiuriuni iyong. Nyiimenya itiokon na emojongea.

²³Togiel iteni, ka aosou, ka ngakitatamet ta achwaanu. Ejokak ngakiro nguna noi nyejoikinit egielario.

²⁴Apakeng a itwaan ani etenoono, elakara lokojokon. Itwaan ni eos lokookeng, inisakinor ngesi lokookeng.

²⁵Kitalaka apakon ka itiokon. Kimiek ngina kolong kidouni talakar.

²⁶Lokoku, topupok lokojokon. Kiwap elote kang.

²⁷Ikwaan amalaat ka akipany nakooyen. Ee robo, ikoni ngesi akar nakaadingan.

²⁸Kiperuni loger a ngirukooi. Ngakiro nguna alalakearotor ngikiliok lu eloloto.

²⁹Ngae ichana? Ngae ialolongi? Ngae ika ekurikur? Ngae ika eburas? Ngae eyakasi ngajemei na nyeyeni ni etorunete? Ngae erengak ngakonyen?

³⁰Kesi ngitunga lu etikonokinosi emuna. Kesi lu eminasi aroanar emuna lu imorimoritae.

³¹Tojongo akitere arengis a emuna, ka eger lo emalimalea alokopo, ta eger lo itorio lodokole niajokon.

³²Ani ekisidi kitokony loger a emun alo akisierit.

³³Itaapirikini ngakonyen kon taanyunga ngiborei lugelayek, kibiler ngitamen kon kiruor moding.

³⁴Ikokini iyong itwaan ni eperi alokiding anam, ni imasanar alokiding atubwa na imatamata.

³⁵Ilimuni iyong tama, “Karamitae ayong, nakaneni nyawanan. Kedisitae, nakaneni nyepipilikina. Ekoe, ori edaunotor ngaju, atasaka epurot eche?”