Read turkana Ngakamatak 24 Bible Online

Ngakamatak 24 - turkana bible

Ngakamatak 24

¹Wara nyikiting etereku kotere ngitunga luaronok, kori nyiisak aelokin ka kesi,

²kainyo akisiakin ngichan itamete kesi. Erai ekiruor kech daang lo esakere akiwan ngitunga luche.

³Aosou eduki awi. Kitowo achwaanu.

⁴Achwaanu ngesi ilelebi ngiboro namaniyae. Kileleb ngiboro luajokak, lu elalak ngaropiyae.

⁵Ejok itwaan nikooson idwangit nikaagongon.[17] Idwangit achwaanu ngikilinga.

⁶Kainyo ejoikinit itwaan erekini ngakiro niajokon eringa ejie. Ani kianyu iyong ngikesuruorok lukaalak idwangi alojie.

⁷Egogongikinit ekabangabangat aosun. Nyepaki akituk nairuorore ngakiro natenoyek.

⁸Itwaan ni ereat jiik akisub naaronok, enyarao ekechanan.

⁹Ngakiro daang na ereat itwaan nibaang, eraakasi akisech. Eremokino ngitunga itwaan ni imenyi luche.

¹⁰Ani kililimiyo iyong akolongit na ngichan, ipalag iyong dir.

¹¹Toyuu itwaan ni erikoritae akiar. Kiratak ngulu iteroterooro nangolanot.

¹²Ipedori iyong alimun tama, “Wae, pekiyeni sua!” Nakaneni toyen atamar Akuj na eroanari ngitai itee ngakiro daang. Kitee ngesi iyong kiyeni. Kitachi ngesi iyong itemem ka na isubi iyong!

¹³Lokoku, tanyam akimiet a ao, kainyo ebob. Eger cha lo eboboo akimiet a ao anangajep,

¹⁴eger lopei ngolo eboboo aosou alotau. Ani kianyu iyong aosou, ejokearosi ngakiro kon na isidiuno. Epete ngakiro na igienokin iyong jik.

¹⁵Nyiikwaanikin ka ngitunga luaronok. Nyiiperu itwaan niajokon anawi keng. Nyiikoko awi keng.

¹⁶Nyemisitae itwaan ni etenoono tani kedakar ngadakaret ngakan-kaarei, enyouni nabo, nakaneni emunyarosi luaronok a nginyas.

¹⁷Nyiilakar ichanyunosi emoit kon ka naaronok. Nyiikianar na ilegeunea ngesi ibore tadakar.

¹⁸Ingolikini Ekapolon Akuj atamar ikianar iyong ngesi, tongo, sodi toree angoit keng anitwaan kangini.

¹⁹Wara ngitunga luaronok nyikisialolong. Wara nyikiting etereku kotere kesi.

²⁰Emam itwaan niaronon ibore iche igieno. Emam ibore iche eringa idarit.

²¹Lokoku, toker Ekapolon Akuj ka ekapolon. Nyiiruko ka ngitunga lu engerito kesi.

²²Kainyo epedorete kesi ayaun ngakiro naaronok atipei. Ngae eyeni nginyas lu eyaunete Akuj ka ekapolon?

²³Alimut ngikoosok kona. Nyejok akipakanar ngitunga alokies.

²⁴Itwaan ni elimokini ekasechan tama, “Nyisechit iyong,” ilamete ngitunga daang toremokinos.

²⁵Ngulu ikilakinete ekasechan, isikokinosi nabo emini ekipur loajokon.

²⁶Itwaan ni etachuni akiroit na iyookino, erai epae lo a iteni.

²⁷Nyiiduk akai ka asubakin ngakiro a awi, eringa nyitakina amana kon, toyen atamar ianyu ibore ni itemokino iyarea.

²⁸Nyiiruoror itwaan niche naaronok, tamam ngakiro na esubit. Wara nyiisudok itwaan ngini ngakiro.

²⁹Nyiilimu tama, “Asubea ayong ngesi loger lo ngoon kasubea ayong. Atachakini ayong ngakiro nakasubea ayong!”

³⁰Etoruni ayong mana a itwaan anikalany, etoru mana a ngimusabib a itwaan anibaang.

³¹Abu atoriangakin! Arupunito ngiikwa amana ngina awadaang, atoriam kilelebun edoan wadaang. Atoriam alaar keng na ngamoru keukun.

³²Atokienyik kona, etama ngakiro keng, ani ekisidi atoriam ngakitatamet.

³³Ani kisaki ajotoor wadio, kori akilurakin, kasio! Tokudok ngakan kianga wadiochichi!

³⁴ Nakaneni toyen atamar esaa lo ijotoo iyong, kilomakini iyong eboot loger a erukoot, kitolomak amamau a ngiboro loger a itwaan ani etingit ngiboro lujiet.