Read turkana Ngakamatak 25 Bible Online

Ngakamatak 25 - turkana bible

Ngakamatak 25

¹Ngakamatak a Solomon ngache nugu na kolong egirete ngitunga a Esekia alo arai ekapolon a Yuda.

²Ipuroi Akuj kotere ngakiro na idait. Ipuroi ngikapolok kotere ngakiro na engichunete.

³Nyipedori akiyen ngakiro na itamete ngikapolok, kilanyito ngoni ngitamen kech loger lo elonia adis ka eger lo etulukukio anam.

⁴Tolema aangoreanut anakwangat sodi kitiaku eketiakan ibore niajokon.

⁵Tolema ngiketutukok luaronok ani a ekapolon, toyenikinae apolou keng a ateneanut.

⁶ Nyiilot akitojoka ani a ekapolon, kori nyiisak aliwor itwaan ni eyenikinitae.

⁷Kainyo ajok alimokino kona, “Bua kiboikin ngaren nege,” akidwang alemaro ani ibooyo, kitotiyaar alongaren ekapolon.

⁸Nyiikirikiraar lokies alimor ngakiro na ingolik. Ikokini iyong ai, erai kisidiun iche kitopeg?

⁹Ani kingolopa iyong ka ekidunyet kon, torumosi esi make. Nyiilimo ngakiro namunonoe a itwaan aniche.

¹⁰Eliworosi ngileech erai keyen itwaan daang atamar nyimunoni iyong ngakiro.

¹¹Akiroit na itemokinitoe elimunitoe, ikwaan ka egolit lo itoweyo anakwangat.

¹²Eger lo ikilakinea itwaan nikooson, kikilak itwaan ni echamit apupokin, ejok noi idwangit ekababaat a egolit ka asir a egolit.

¹³Itililimi emeanara loajokon etau a itwaan ani emearit, loger a ngakipi anakaalimok ngirwa lu eriraa akolong elemio ngamanat.

¹⁴Itwaan ni iwoga ebala alemuni ibore, sodi nyeelemu, ikwaan ka ngidowon ka ekuwam lu nyeyaunete akiru.

¹⁵Itwaan ni iapunit ngakiro, epedori kimaimai ekapolon. Itwaan nikaabon a akituk, epedori tani ngakiro nakationok.

¹⁶Ani kianyu akimiet a ao, tanyam na itemokino. Ani kinyam nakaalan, kiteleki.

¹⁷Nyiiruchak aloseenen kai a ekidunyet kon. Ipenuni anikeng, sodi kitoremokin.

¹⁸Itwaan ni itingakini ekidunyet keng ngakiro na nyeraakasi iteni, ikwaan ka esebo, kori ekileng, kori emal lokakwanan.

¹⁹Akigienokin itwaan niaronon akolongit na ngichan, ikwaan ka anyakaa akimuj a ekelae alo iloiloo, kori alosit a akeju ana engwalit.

²⁰Aeonokin itwaan ni eriab alotau, ikwaan ka abutor ngiworui keng akolongit na akatorot, kori akirigakin amakat najeme.

²¹ Ani kenyamit emoit kon akoro, kisumuj. Ani kenyamit akure, kitamat.

²²Kainyo enomete ngakiro nguna ngesi tosub iasi iyong ngatotol a akim nakou keng. Kiinakini iyong Ekapolon Akuj ebachit.

²³Eyauni aswam arem loger lo eyaunea ekuwam loapolon akiru.

²⁴Ejok akilom naita a akai, akidwang akiruk ka aberu nakeburan alokai.

²⁵Ejokak ngakipi nakaalimok nakinyamea akure. Aloger alopei kangolo, ejokak ngakiro naajokak epote anikalonan.

²⁶Itwaan ni etenoono ni epupokinosi ka itwaan niaronon, ikwaan ka akuja na ichwalimakinitae, kori akar na ebukokinitae ekitoe lokaaran.

²⁷Nyejok akinyam akimiet a ao nakaalan, kiapun robo anakisak ekipur.

²⁸Itwaan ni nyetikokini angoit keng, ikwaan ka ere lo etijikin kimiekinae emam ngawasea.