Read turkana Ngakamatak 26 Bible Online

Ngakamatak 26 - turkana bible

Ngakamatak 26

¹Nyechamam ekipur ka ekabangabangat, loger lo nyechamatar eloch ka akamu, kori loger lo nyechamatar akiru ka ngirwa lu elemere ngamanat.

²Nyikiwanete iyong ngilam mati isechit. Ikwaan ka ngikieny lu eporito, towounito adore.

³Ejoikina angole idesio. Ejoikina esikira erubio. Ejoikina ekabangabangat inapio.

⁴Nyiitachak ekabangabangat ngakiro, ani kitachak, ibangaana iyong dang.

⁵Tatachak abaangu nabaangu, toyenea itwaan ni ingita atamar abangaana ngesi.

⁶Ani kimea iyong ekabangabangat ayaar ngakiro, totubo tani ngakejen kon, kainyo inyaraunit iyong ngichan pas.

⁷Ngakamatak na itorunito nakituk a itwaan anibaang, eraakasi ngapasiek, ikwaan ka eger lo iyoloyolotor ngakejen a itwaan ani engwalit.

⁸Erai pas akidodikin itwaan nibaang arimatoi, ikwaan ka akien amoru na esakio achakar.

⁹Ekabangabangat lo esaki ekiruor ngakamatak, ikwaan ka itwaan ni irakarit epurot ni esaki akuun eekwae anakan keng.

¹⁰Itwaan ni igiri ekabangabangat kori itwaan nikamatan epurot, ikwaan ka ekaguman lo ewani itwaan daang.

¹¹Itwaan nibaang ni ebongonokini jiik akisub ngakiro na abaangu, ikwaan ka iingok ni ebongokini ngalekan keng.

¹²Ejok ekabangabangat lobaang noi akidwang itwaan ni ebala aos, tarai nyeos.

¹³Ebala itwaan nikalany ilelenyi apudor nikalapatan, “Eyei engatuny lorukudi! Eyei engatuny nikalapatan!”

¹⁴Ibelobelo itwaan nikalany ani eperio, emam bo ni eakari dang, ikwaan ka ekidor lo ereanar ani edupakinitae.

¹⁵Irepakini itwaan nikalany akan natubwa sodi kileleny abuun nakituk.

¹⁶Itamit itwaan nikalany atamar aos akidwang ngitunga ngikan-kaarei lu epedorete akiruor ngakiro na esakete.

¹⁷Itwaan ni echulokin loburas lo nyerai ekeng ikwaan ka itwaan ni elosi nikalapatan kirum iingok toting ngaki.

¹⁸Loger a itwaan ani ikerepikinit ani imasanari ngasarae, ka ngimalea a amod ta akitu,

¹⁹ikoni neni itwaan ni ibatari niche, ani erumor tama, “Erai ibore abolia karika!”

²⁰Ani kengopa ngakito, edunge akim. Ani kengop eswamit, edaun eburas.

²¹Itonoki atotole akim, itirirauni akitoe asarae a akim, eger lopei ngolo ngesi erikitor itwaan nia ngichan eburas.

²²Ebobok ngakiro a ekaswaman, ilijasi nakwaan niajokon.

²³Akisosware[18] toroko ngakiro na eya lotau, ikwaan ka eger lo emalimalea[19] amot nalupe.

²⁴Idait itwaan nikamodeanan aremo keng ani itobobotor akituk.

²⁵Ani kiruorik itobobot akituk, nyiinup ngakiro keng, kainyo ileleba aremo lotau keng.

²⁶Epedori ngesi akidaa aremo keng, nakaneni ileereuni aronis keng alotunga kadaang.

²⁷Itwaan ni ebokari akipany, ngesi ilope echakakin nakipany ngina. Itwaan ni ijukari amoru kikokoriyor, etiki amoru ngina ngesi.

²⁸Eremokino ekaliokon ngitunga lu ingalae. Eyauni akisosware ngichan.