Read turkana Ngakamatak 28 Bible Online

Ngakamatak 28 - turkana bible

Ngakamatak 28

¹Ekeri itwaan niaronon tani emam ibore irisit. Ani itwaan ni etenoono, ededeng loger a engatuny.

²Na esechea akwap, toliwor elunyi ngikapolok. Nakaneni ewei akwap na eyakasi ngikapolok lukoosok tochwaaka.

³Ekapolon[20] lo ichiekiari ngikebootok, ikwaan ka akiru na erami tokut ekuwam todita ngikito daang.

⁴Ngulu nyekachito etal, ibakito ka luaronok. Ani ngulu irichakinito etal, nyechamam ka luaronok.

⁵Nyeyenete ngitunga luaronok ngakiro na eriyan. Ani ngulu ekerito Ekapolon Akuj, eyenete ngakiro nguna lokojokon.

⁶Ejok aliwor ekebootonit tarai lo kimunoi, akidwang aliwor ekabaran tarai lo nyikimunoi.

⁷Eos esorokit lo irichakinit etal. Nakaneni ngolo erukito ka ngikadakak, eyaunit ngileech nika apakeng.

⁸Itwaan ni ebari kotere akiatanakin ngamichae na iposi, elosi ebari keng nitwaan ni iposi ngiboro lokebootok.

⁹Ani pekiwap itwaan etal, engeri Akuj akilip keng.

¹⁰Itwaan ni ingalae itwaan ni etenoono kitusub naaronok, isurumi eloit keng a ilope, alongalas. Nakaneni eanyunete lu nyesechito ebachit.

¹¹Ebala ekabaran kori aos nakaneni eos ekebootonit noi lo echwaana.

¹²Na eanyuneta ngitunga luajokak apolou, talakaros ngitunga daang. Ani keliworosi luaronok ngikapolok, toduka ngitunga.

¹³Itwaan ni idait ngasechesea keng, nyejoker eboyor keng. Itwaan ni elimori akisech keng tolung, erimakini Akuj ngesi.

¹⁴Epiaritae ngini ekerit Ekapolon Akuj jiik. Nakaneni inyasunio itwaan nikechanan.

¹⁵Eboliar ekapolon loaronon ngikebootok, ikoni ngesi engatuny lo irurumae, kori etiengit lobe edubu lokaadengan.

¹⁶Ekapolon lo emam achwaanu, erai erukoot lokamoitanan. Nakaneni ngolo eremokino na nyeriyan, epolokini ngirwa lukaalak.

¹⁷Itwaan ni ekudito ngaakot a itwaan aniche, kimiekisi todok nakwap ache tanang etoani, nyiingarak itwaan ngesi.

¹⁸Eyuunio itwaan ni emunoi. Itwaan ni nyemunoi, edakar atipei.

¹⁹Eketan lo irichakina alomana keng elalaar akimuj na eanyuni. Ani itwaan ni iwapit ngakiro napasiek, eliwor ekebootonit.

²⁰Epiario itwaan ni etenoono, ani ni esaki akikirikiruun ebari, nyebuchar nyirira.

²¹Erono akipakanar ngitunga. Tarai echamuni itwaan iche akisub naaronok na einakinere ibore nidiochichi nidiaket.

²²Esaki itwaan nikamonan akopun ebari, nyeyeni atamar edikino eboot ebuni.

²³Kikilak itwaan, ani ekisidi ejoikinete ngesi nguna akidwang akisosware.

²⁴Itwaan ni ekokoiari ibore alokauriak keng niti ebala, “Nyerai akisech,” ikwaan ka itwaan nikokolan.

²⁵Eyauni itwaan nikadakan ngichan, nakaneni epiario ni igieno Ekapolon Akuj.

²⁶Ebangaana itwaan ni iwapit aosou keng a ilope. Itwaan ni epupi ngakiro a ngikoosok, emam ibore etapi.

²⁷Itwaan ni iposi ngiboro lokebootok, nyengopikini ibore, ani itwaan ni ekudit akan alokebootok, ichienete ngitunga lukaalak.

²⁸Na eanyuneta luaronok apolou, toduka ngitunga. Ani edakarosi anapolou, tarata lu etenooko ngikapolok.