Read turkana Ngakamatak 29 Bible Online

Ngakamatak 29 - turkana bible

Ngakamatak 29

¹Itwaan ni ikilanakinio jiik torubak ichanana, ewanio akolongit apei tongop kona itedekuunio.

²Na eliworotor ngitunga lu etenooko ngikapolok, talakaros ngitunga. Ani eliworosi luaronok ngikapolok, kisiakis ngitunga akialolong.

³Itwaan ni emina aosou, italakari apakeng. Nakaneni ebangaana itwaan ni isunyakini ngaropiyae keng namalae.

⁴Ekapolon lo esubi ngakiro na eriyan, itowei akwap. Ngolo erai ngaropiyae make idie, inyasuni akwap.

⁵Itwaan ni isoswae ekidunyet keng, elokakinit eloit keng a ilope.[21]

⁶Isurumete ngitunga luaronok ngasechesea kech a ngikulepek. Nakaneni elakuna itwaan ni etenoono, elakara.

⁷Eyeni itwaan ni etenoono ngakiro na echamit esubere ngikebootok. Nyeyenete ngitunga luaronok nguna.

⁸Ngitunga lu imenyarito luche, ilomakinete ere etia ni etia lochan. Ngulu etenooko, etikokinete ngakiro naaronok nyiileereut.

⁹Ani kepegakin itwaan nikooson ka itwaan nibaang, ekieni nibaang, kiruor irema ka akiyenya.

¹⁰Ngitunga lukaarak, eremokino itwaan ni nyesechit. Nakaneni iyokiyete[22] lu etenooko akiyar a itwaan kangini.

¹¹Isunyuni ekabangabangat angoit keng etikokini itwaan nikooson angoit keng.

¹²Ani kepup ekapolon ngakiro na alioko, eliworosi luuchik keng daang ngikaliokok.

¹³Ibore en isikwaanit ekebootonit ka itwaan ni ichiekiarit ngesi, Ekapolon Akuj einakinit kesi daang ngakonyen.

¹⁴Ani kesubea ekapolon ngikebootok ngakiro na eriyan, erubi apolou keng.

¹⁵Akulit ka akikilakin kesi erikito aosou. Ani kimiekin ikoku tosub nacha esaki, isurumi itiokeng ngileech.

¹⁶Na eliworotor ngitunga luaronok ngikapolok, kiatakin asechanu. Idarito lu etenooko akingolikin ngitunga ngulu edakarosi.

¹⁷Kitatam lokookon eboyor loajokon, kisiangari ngesi iyong. Ee robo, italakari ngesi etau kon.

¹⁸Akwap na nyekerit Akuj, nyirichakinit etal. Epiaritae itwaan ni irichakinit etal a Akuj.

¹⁹Nyitatamete ekasuban etich ngakiro a akituk make. Epedori kiira nakaneni nyeemisik.

²⁰Ikwa ejok tani akigienokin itwaan nibaang akidwang itwaan ni ekoponokin ekiruor.

²¹Ani kiinak iyong ekasuban etich kon ibore ni esaki cha daang napei alokiditeu, elemari akolongit apei ibore ni itingit iyong daang.[23]

²²Eyauni itwaan ni enyunyura eburas. Eyauni nikangoan ngichan.

²³Ebukor itwaan nikewogan. Ngini itiditeuna, eanyuni arimatoi.

²⁴Erukitos a ekokolan ngesi erai emoit keng. Irirao ngesi kelimo iteni alokies. Nabo irirae Akuj ngesi erai pekelimo nguna iteni.

²⁵Erono akiker itwaan niche, ngini igieno Ekapolon Akuj, eyuun.

²⁶Esaki itwaan daang katominak ekapolon, nakaneni Ekapolon Akuj bon esubi ngakiro na eriyan.

²⁷Ngitunga lu etenooko, eremokino ngitunga luaronok, nabo eremokino luaronok dang lu etenooko.