Read turkana Ngakamatak 3 Bible Online

Ngakamatak 3 - turkana bible

Ngakamatak 3

¹Lokoku, wara nguna ketatami nyikimuriakis. Kirichak jiik ngakiro nakadungok ayong iyong.

²Iatakinete ngirwa kon lu iyarea, toliworos lu alakara ka ekisil.

³Nyiitiakasi ka ateneanut ta amuno. Toinik kesi lomosiring kon. Kigir lotau kon.

⁴ Ani kisub kongina, kiminakini iyong Akuj, kitominakis ngitunga dang.

⁵Kigienokin Ekapolon Akuj a etau kon kadaang. Wara nyiigienokin aosou kon a ilope.

⁶Tolimo Ekapolon Akuj alorotin kon kadaang, itenikini ngesi ngirotin kon.

⁷ Nyiitama robo kori ios iyong noi, toker Ekapolon Akuj, tonger akisub naaronok.

⁸Ikokinete nguna ekitoe lo itangalekini ngajemei kon ka nikaapilan.

⁹Toliwor lo irima Ekapolon Akuj kon tolemik akimuj na ekingaren a ngalemet kon kadaang.

¹⁰Ani kisubak nguna, ilelebunosi ngidulae kon ngalemet, kipichun ngituol kon emuna.

¹¹ Lokoku, nyiimenya arikino a Ekapolon Akuj, wara nyikibur nakikilakinea ngesi iyong.

¹²Kainyo ikilanakini Ekapolon Akuj ngini emina ngesi, loger lo ikilanakinea itwaan lokookeng lo emina ngesi.

¹³Epiritae itwaan ni eanyuni aosou, ka itwaan ni eanyuni achwaanu.

¹⁴Ejok ibore ni eriamuni itwaan anaosou akidwang ni eriamuni anakwangat. Ejok aosou idwangit egolit.

¹⁵Idwangit aosou ngamoru nakaalak a ngaropiyae, emam ibore nikiminari ni itemere aosou.

¹⁶Kiinakini aosou ngirwa lukaalak toyarea, kiinakini ebari ka arimatoi.

¹⁷Itiliwori eboyor kon lo alakara, kitorik akaalimon.

¹⁸Elakara lukoosok, einakini aosou kesi akiyar.

¹⁹Asubuni Ekapolon Akuj akwap a aosou keng, kitowo adis a achwaanu keng.

²⁰Kotere aosou keng, topedun ngakipi analup, talakakis ngidowon ngakipi todoto nalup.

²¹Lokoku, kirichak aosou naajokon ka akiyen ngakiro, wara nyikibuch.

²²Kiinakinete kesi iyong akiyar, ikokinete asir alomosiring kon.

²³Ilosi iyong wadaang akaalimon, emam ibore kilegeuni.

²⁴Nyiemi na inapakinor, ijotoor ngaju nakaabok akwaar kiiya.

²⁵Nyiem naaronok ituturiaunosi, kori nginyas a ngitunga aluaronok.

²⁶Kainyo Ekapolon Akuj igieno iyong, kiratakini ngesi iyong nyiidakakin loloit.

²⁷Tosubea naajokak ngulu ejoikinit esubere, erai kipedori akisub nguna.

²⁸Nyiilimok ekidunyet kon tama, “Kape, tobongu moi kainak,” totingite iyong ibore ngini kaneni.

²⁹Nyiituk asubea ekidunyet kon naaronok, tarai elomit ngesi diyete kon ani kimunor iyong.

³⁰Nyiimoriata ka itwaan ngakiro pas, erai pekisechakinit ngesi iyong.

³¹Wara nyikiterekia itwaan nikamoitanan, kori nyiiwap elote keng.

³²Kainyo eremokino Ekapolon Akuj lu esubete naaronok, nakaneni emuno ngulu etenooko.

³³Ilamit Ekapolon Akuj ngawiyei a ngitunga aluaronok, nakaneni epiarit ngawiyei alu etenooko.

³⁴ Imenyarit ngulu a ngimeny, nakaneni einakinit ngulu itiditeuna ajakaanut.

³⁵Eanyunete lukoosok ekipur loajokon, nakaneni eanyunete lubaang ngileech.