Read turkana Ngakamatak 30 Bible Online

Ngakamatak 30 - turkana bible

Ngakamatak 30

¹Ngakiro a Agur nugu alo arai lokookeng a Yake. “Nyikirukit ayong ka Akuj, nyikirukit ayong ka Akuj.

²Abangaana ayong loger a etiengit, nyikikwaan ka itwaan. Emam ayong achwaanu na ngitunga.

³Nyitatama ayong aosou. Nyayeni ayong Akuj tani wadiochichi.

⁴Ngae anangit nadis toyen ngakiro na eyakasi inaa? Ngae erum ekuwam toting? Ngae abunaki ngakipi nawaru? Ngae egerokini ngikukuorin a akwap? Ngae ekiro a itwaan kangini? Ngae lokookeng?

⁵“Iyoonokini Akuj ngakichikakinet keng daang. Erai ngesi aupwal a ngitunga alu emechete ngesi.

⁶Ani kitingak iyong Akuj ngakiro na nyelimuno ngesi, kikilakini ngesi iyong kitiliwo ekaliokon.”

⁷Akuj, kelipit ngakiro ngaarei, nyikimik eringa nyetoana.

⁸Tolema alioko anakituk kang. Nyikiinak ebari kori eboot. Kitanae a akimuj ana ketemokino.

⁹Ani kemwono noi, kangeri iyong atama, “Ngae erai Ekapolon Akuj?” Kori ani keboot noi, akokoi, esurum Akuj kang ngileech.

¹⁰Wara nyiitoron ekasuban etich ani a ekapolon keng, kichieni ngesi iyong, toliwor iyong isechit.

¹¹Eyakasi ngitunga lu ichienete ta apakech, nabo nyelakara kotere ta itiokech.

¹²Eyakasi lu itamito atamar kikiuna kesi, kileleba asechanu nikech.

¹³Eyakasi lu inisasi, lu imenyarito ngitunga luche!

¹⁴Eyakasi lu eboliatar ngikebootok ka lu emam ibore etingito. Eyarakinito nakiro nguna.

¹⁵Eyakasi ekurut tanakookeng ngaarei, elimokinitae daang ekiro be, “Nakinae ayong.” Eyakasi ngiborei nguomwon lu nyimwokeenete,

¹⁶ni eyakasi ngikatoak, aberu na ekolupana, ngalup nakoonok na iitanito akiru, ta akim na erirae na emam kona itudungeo.

¹⁷Itwaan ni ekienar apakeng kori imenyarit itiokeng anamojongu ejoikinit enyamete ngataruk kori toutosi ngikuruka ngakonyen anakou.

¹⁸Eyakasi ngakiro ngoomwon naparing nakakuruwosi ayong akiyen,

¹⁹egole lo eporit alokidiama, emun lo eliat anataaba, atubwa na ilebolebo ananam ta eger lo echamunotor ekile ka apese.

²⁰Ngakiro na esubi aberu nakaloman nugu. Imuji, kisuta akituk, tapalua tama, “Emam naaronok asub ayong!”

²¹Eyakasi ngakiro ngoomwon na nyitiri akwap,

²²ekedalan lo eliwor ekapolon, ekabangabangat lo etingit akimuj nakaalan,

²³aberu nangereny na iusio ta akedalan na ilunyokin nados a aberu analope a awi.

²⁴Eyakasi ngiborei nguomwon luuchik, taraakas lukoosok noi,

²⁵ekatapan, emam ngikilinga, tarai ikachete akimuj na enyamete nakamu.

²⁶Ngadukae, emam ngikilinga, tarai ebokete ngatabab tarata ngakais kech.

²⁷Emaase, emam kesi ekapolon, tarai erekina eloose.

²⁸Taatangarewa, itingi iyong apei a akan, tarai eyakasi nakais a ngikapolok.

²⁹Eyakasi ngiborei nguomwon lu kiminarete eloose,

³⁰Engatuny, eyakasi ngikilinga alotieng kadaang, ereit ngitieng luche daang,

³¹ka ekoroe, ka ekokoroit lo etubonor ta ekapolon elosi alongaren ngitunga keng.

³²Ani ngoon kibangaana iyong, kirai ekewogan lo ireat ngakiro naaronok, tapalik.

³³Ani kibuka iyong ngakile, ianyuni akimiet. Ani kiram iyong itwaan lokumes, eiyete ngikumes. Ani kibenyaner iyong, ilomari lochan.