Read turkana Ngakamatak 31 Bible Online

Ngakamatak 31 - turkana bible

Ngakamatak 31

¹Arai Lemuel ekapolon a Masa. Ngakiro nugu kesi etatami itiokeng ngesi.

²“Irai iyong lokookang lominat. Iyong irai atachunet a akilip kang. Anukiro kalimokini?

³Wara nyiisunyak ngikilinga kon naberu, nyiisunyak ngaropiyae kon daang naberu. Ngaberu enyasut ngikapolok.

⁴Topupok Lemuel. Nyejoikinit ngikapolok emaase emuna, nyejoikinit imuit epurot.

⁵Ani kemat imuriakinete ngitalio, kimuriakis ngakiro na echamit esubere, ngitunga lu eyakasi lochan.

⁶Erai epurot eka ngitunga alu ekot akitu, erai emuna eka ngulu enomito ngakiro.

⁷Kimiek tamata kimuriak eboot, nyiitamut nabo jik ngichan kech.

⁸Kiruor toweik ngulu nyepedorete ekiruor ngakiro kech. Kiruor iikinit nguna echamit esubere daang lu eyakasi lochan.

⁹Toweik ngakiro kech, toliwor ekatubon ngakiro lo etenoono. Kiruor iikinit ngikebootok ka lu ichanasi”.

¹⁰Nyepatana aanyun aberu naajokon! Ejok ngesi noi akidwang asir a ngasua!

¹¹Emuno lokile keng ngesi, nyiboosi ekile ngolo jik.

¹²Ngirwa daang, eringa cha aberu ngina eyari, esubea lokile keng ngesi naajokak, emam naaronok esubea.

¹³Esakuni ngesi ngajul a ngamesekin ka ngawarui nakaanikak todony a ngakan keng.

¹⁴Eyaununi akimuj keng anikalonan loger a angatubwae anaapolok a ngimuchurus.

¹⁵Enyouni eringa akwap eribit, kidorok akimuj a awi keng, tolimonok ngikedalak keng etich lo esubakinete.

¹⁶Ingolikini ngesi amana sodi togiel. Elemuni ngaropiyae a ngakiinyir keng sodi kitaa amana a ngimusabib.

¹⁷Itirit ngesi etich nabo imukeana.

¹⁸Eyeni ibore ni eriamuni alotich keng, enoki ataa keng nakwaare.

¹⁹Eoyi ngaunoi keng a ilope, edonyi ngiworui keng a ilope.

²⁰Nyekudit akan keng alokebootok, ingarakinit ngulu iitanito ibore.

²¹Nyiteriangakini ngesi akatorot, kainyo enapito ngitunga a awi keng daang ngiworui lu iratakinete akatorot.

²²Edonyi ngawarui na epetakinio, enapit ngiworui lupusiek-arengak, lukaanikak.

²³Eyenikinitae lokile keng alokitoe a ngikiliok, na iboikinor kiding ngikasukou a adakar.

²⁴Edonyi ngiworui lukaanikak ajokak, sodi togielana. Egielanari ngarubae lomuchurus.

²⁵Eyakasi ngesi ngikilinga, nabo ekeritae, nyialolongi ngakiro naka moi.

²⁶Ngakiro na aosou kesi itorunete nakituk keng, ngakitatamet na apatanu kesi itorunete nangajep keng.

²⁷Ikunyikunya ngesi jiik, taanyuneta ngitunga a awi keng akimuj.

²⁸Elakara ngide keng kotere ngesi, ipuruunit lokile keng ngesi, ebala,

²⁹“Esubete ngaberu nakaalak ngakiro naajokak nakaneni idwangit iyong kesi daang.”

³⁰Ingalana akorianut, erai akibuseanu pas, nakaneni aberu na ekerit Ekapolon Akuj, ejoikinit ipuroi.

³¹Nak ngesi ibore ni itemokino kotere etich lo esubi. Echamit ngitunga daang erimasi ngesi.