Read turkana Ngakamatak 4 Bible Online

Ngakamatak 4 - turkana bible

Ngakamatak 4

¹Talokoku, topupokisi nguna kitatami apakus. Todetasi ngaki, tochoiasi.

²Ketatami ayong esi ngakiro naajokak, nyiisikis ngakitatamet kang.

³Nakolong aditia ayong kirukit ka apakang, na araakar ayong lominat, epei bon ani a itiokang,

⁴Ketatam apakang ayong tama, “Kirichak ngakiro naketatami ayong iyong, kiwap ngakiro nakadungokinit ayong iyong, sodi toyar.

⁵Taanyu aosou toyen ngakiro! Wara ngakiro kang nyikimuriakis kori nyiipasak.

⁶Nyiisik aosou, kirichakini ngesi iyong. Tominak aosou, kiyoki ngesi iyong.

⁷Ibore niteno ngesi aanyun aosou, ani keyei ichebore echamit ianyuni, taanyu achwaanu.

⁸Tominak aosou, kitiliwori iyong lokiyenikinitae. Kilogak aosou ngakan, kiinak ekipur.

⁹Ebutokini aosou achaat naajokon nakou kon, kitanap ekiraun lokiminari.”

¹⁰Topupok lokoku, totionik ngakiro nakesuruori ayong iyong, talalakearotor ngirwa kon lu iyarea.

¹¹Ketatam ayong iyong aosou ka ateneanut.

¹²Ani kiosu iyong, emam ibore iriwokin lorot kon ilosi, nabo emam ibore kilegeuni imatar.

¹³Toting jiik ngakiro nakitatamio, wara nyikibuch. Kirichak kainyo kesi eraakasi akiyar kon.

¹⁴Nyiiwap ngirotin a ngikasechak, nyiiwap erot a ngitunga aluaronok.

¹⁵Totiaak erot ngolo, nyiitor neni. Nyiiwap erot a ngitunga aluaronok, torei alorot kangolo, sodi kiwapak erot kon.

¹⁶Nyejotoorosi ngitunga luaronok, mati kesubakis naaronok. Ikoleri kesi mati kewan itwaan.

¹⁷Ikoni aronis anikech akimuj nanyamat. Ikoni adedengu anikech emuna lo emasio.

¹⁸Erot a ngitunga alu etenooko ikoni akicha a akolong na ipiripirunea, kiatanakin akicha ngina tanang ekwanger kea.

¹⁹Nakaneni erot a ngikasechak ikoni aribu nakirion chuch. Edakanarosi kesi peeyenete ibore ni elegeuni.

²⁰Lokoku, topupok ngakiro kang, todeta akit kiira nguna alimuni.

²¹Wara nyeebucharosi, kirichak alotau kon.

²²Kainyo eraakasi akiyar anitwaan ani echoiari, itedekete akwaan keng.

²³Tochoik noi etau kon, kainyo eitanit a akiyar kon ngolo.

²⁴Nyiitorut naaronok nakituk kon, totiakas ka alioko ta amodeanut.

²⁵Kidirak nakonyen kon ngaren, tokienyik ngini eyei ngaren kon.

²⁶ Tokienyik erot lo itorit iyong, tojokearos ngirotin kon daang.

²⁷Tonger naaronok kidira ngaren, nyiitubonor teten kori kedieny.