Read turkana Ngakamatak 5 Bible Online

Ngakamatak 5 - turkana bible

Ngakamatak 5

¹Lokoku, topupok aosou kang, todeta akit kiira achwaanu kang.

²Sodi tochwaaner, kiruor ngakiro na aosou.

³Epedorete ngipon a aberu anamalaat aboboor, loger a akimiet a ao, esulut enue keng loger a akimiet.

⁴Nakaneni ani enangi losal, todwarer noi loger a emus, nabo tokwaner loger a ekileng alo ekwaka ngiwaitin daang.

⁵Kiyaari ngesi iyong nakitu, iwapit ngesi erot lo elosi lokatoak.

⁶Nyiwapit ngesi erot lo elosi nakiyar. Ewowoot ngesi nyeyeni ni elosi.

⁷Tokona bocha, talokoku, topupokisi, warasi ngakiro kang nyikimuriakis.

⁸Tochoikin anaberu ana ikoni ngina! Tochoite inutari akituk a akai keng.

⁹Ani kinang, egelakin itwaan elemari arimatoi na kolong arai akon, sodi toloto ngikaru kon lotunga lukamoitanak.

¹⁰Ee robo, ngitunga lugelayek kesi elemarete ebari kon daang. Itwaan niche elemari ibore daang ni ngoon ichidaritor iyong ngakiinyir.

¹¹Ani enangi esal a akiyar kon, kinapakin iyong lokitanda kon ikunua, tadalachuunun akiring anakwaan kon.

¹²Sodi tolim iyong tama, “Nyo kolong angerio ayong akitenikino? Nyo kolong emenyarea ayong akikilakino?

¹³Nyepupokina ayong ngakiro a ngiketatamak kang, kori nyedetara akit eira ngakiro kech.

¹⁴Atipei abu engolik atamar edikino kamunyario, ketitingitae ngileech alongaren ngitunga.”

¹⁵Ikoni aberu akar, tamat ngakipi na eyakasi nakurum kon a ilope, ee robo, ngakipi na eokunitoe anakar kon a ilope.

¹⁶Kotere nyo epetakinitere ngileleae kon wadaang? Nyo epetakinit ngingololin kon lorotin?

¹⁷Tarata ngingololin ngulu ngikon make, meere ngika ngitunga aluche ka iyong.

¹⁸Topiarae eitanit kon, talakar anaberu ana esorokane kon.

¹⁹Ibus ngesi, ejok ikoni agete. Kitalaka iyong arimatoi keng jiik. Kimiek amina keng kiriam iyong ngirwa daang.

²⁰Lokoku, kotere nyo ichamunea iyong aberu namalaat? Nyo kijoikinitor iyong aberu a ekile aloche?

²¹Itee Ekapolon Akuj ngakiro daang na esubi itwaan. Itee wadaang ni ilosi iyong.

²²Erai akisech a itwaan aniaronon eloit keng a ilope. Erai epuute lo isurumi ngesi ilope.

²³Etoanene ngesi ani emamakar akitenikino, abangaanut keng ebukori ngesi.