Read turkana Ngakamatak 6 Bible Online

Ngakamatak 6 - turkana bible

Ngakamatak 6

¹Lokoku, ani kiweik iyong ngamichae a ekidunyet kon, kori kichamakinosi ka itwaan iche,

²irumun robo iyong bon a ngakiro kon a ilope. Aliworosi ngakichikakinet kon eloit anikon.

³Toyen robo atamar imin iyong nakan a itwaan kangini. Lokoku, ani kisaki iyong ayuun, kape nitwaan ngini atipei, kimaima kitalakak.

⁴Wara nyiijotoor kori nyiilurakin.

⁵Talachakin aloloit loger a ikeny kori a agete ana epuun alokalokan.

⁶Iyong lokalany, kape kiseme ekatapan, kiseme eboyor a ekatapan, toosu.

⁷Emam kesi ekarikon, ka ekatukon kori ekapolon,

⁸tarai ikachete akimuj na ngirwa alu akamu. Echunete akimuj ngirwa lu elemere.

⁹Iyong lokalany, ijotoe tanang ori? Ori inyounio iyong anaju?

¹⁰Ibala cha iyong, “Kimiek atojotoor wadiochichi, kimiek atokudok ngakan eanga wadiochichi.”

¹¹ Kitolomak eboot loger a erukoot alo etingit ngiboro lujiet.

¹²Itwaan ni erai pas, niaronon, ewowoot iruoro ngakiro naaronok.

¹³Edongi a ngakonyen, idamidami a ngakejen ka akidod a ekimoin.

¹⁴Erono etau keng iroki naaronok, ka ayaunit ekurikur wadaang.

¹⁵Kotere ngakiro nguna, ichanyuni ngesi ngakiro naaronok. Ewanio ngesi nikaronon, nyepedori angalekin.

¹⁶Eyakasi ngakiro ngakan-kapei na eremokino Ekapolon Akuj. Ee robo, ngakiro ngakan-kaarei na ekadakinito Ekapolon Akuj.

¹⁷Ngakonyen na ekinis, a angajep nakaliokon, ngakan na earete ngitunga lu nyesechito,

¹⁸etau lo iroki ngakiro naaronok, ngakejen na edodor anakiro anaaronok,

¹⁹ekaanyunan lo iruoro alioko, ka itwaan ni iturumi ngikaitotoi.

²⁰Lokoku, kirichak ngakiro nakidungok apakon. Wara ngakitatamet a itiokon nyikimuriakis.

²¹Togolok lotau kon jiik, toinik lomosiring.

²²Kirikete ngakitatamet nguna iyong ilosi, kiyokiyete inapakin, ani ikienyuni, kitatamete.

²³Ikote ngakiro na kidungokinio ataa, ikote ngakitatamet akicha. Ngakikilakinet nakitatamete, eraakasi ngaka eboyor ajokon.

²⁴Kiratakinete iyong anaberu anaaronon, kiratakinete anangajep anakaabon a aberu a ekile aloche.

²⁵Wara akibuseanu keng nyeemina etau kon. Wara ngakiir a ngakonyen keng nyikiminasi.

²⁶Epedorio amalaat akigiel a amugati. Nakaneni aberu nakaloman, akiyar a ekile ngesi esaki.

²⁷Eyei itwaan iwoki akim alorarum nyeenomiya ngiworui keng a?

²⁸Kori eyei itwaan epedori alosit alokidiama ngatotol na eriraate nyeenom ngakejen keng a?

²⁹Ikoni ekile lo eperete ka aberu a ekidunyet keng neni, itwaan nicha etapi aberu ngina, iteni irirao.

³⁰Nyimenyarito ngitunga[2] ekokolan lo ekokoi enyamit akoro.

³¹Tarai na irumunere, tatach ngatachet ngakan-kaarei. Tajal ibore ni etingit daang.

³²Ebangaana itwaan ni elomi, ngesi ilope inyasuna.

³³Eriamuni ngimacharin ka ngimeny. Irumete ngileech jik.

³⁴Kainyo itelemari etereku ekile, emam ngisien na etachakinea.

³⁵Emam atachanot echamuni ngesi. Nyiapakini angoit keng tani kiudakin ngainakinet.