Read turkana Ngakamatak 7 Bible Online

Ngakamatak 7 - turkana bible

Ngakamatak 7

¹Lokoku, kitamu ngakiro kang, kirichak ngakiro nakadungok ayong iyong.

²Kirichak ngakiro kang toyar. Kirichak ngakitatamet kang, loger lo irichakinitor ngakonyen kon.

³Toinik lomoyo kon, kigir lotau kon.

⁴Tolimok aosou tama, “Irai iyong nakaatokang,” tolimok achwaanu tama, “Irai iyong lopae kang lo epogae.”

⁵Kiratakinete iyong anaberu anamalaat, kiratakinete anakiro anakaabok, a aberu a ekile aloche.

⁶Akolongit apei ayei ayong kai kang, abu engolia alopiding a akai.

⁷Engolik alokiding ngikabangabangae, ee robo, alokiding ngisorok, engolik esorokit epei lo iwaarit,

⁸iwapit erot alo diyete ni iitorea erot, alo diyete ni elomit aberu ache. Kiwapak esorokit ngolo erot, lo elosi nawi a aberu kangina.

⁹Arai ibore atabong ekaikai, esiakinit aribu.

¹⁰Atipei kiriamunos ngesi ka aberu ngina, anapit aberu loger a amalaat, ayakasi ngakiro atukit.

¹¹Arai ngesi aberu nakachalan, nabo ebelana. Peeboyonokin ngesi nawi.

¹²Eyei lorukudi, toyei nigielanaret ngiboro. Eyei nakiitoret a ngirotin daang eperunit.

¹³Kirum ngesi esorokit ngolo tonuak, tokienyik a ngakonyen analerek tama,

¹⁴“Epeyo ayong ngakipeyos kang, asubak akolongit naga ngakiro na ekongit.

¹⁵Ngesi tokona abunitor akisiriamuun iyong. Kasak ayong iyong noi, a ekeny ajokon, kaanyu!

¹⁶Apetakinit ayong ngiworui lukoriyek kaanikak lokitanda kang. Ayaunio ngiworui ngulu alo Misiri.

¹⁷Etukukunyit ayong ekitanda kang a ekinyaate alokaakunyon, ka echuchuka ta ekitoe loongor-nyang kaakunyon.

¹⁸Bua chanai! Kapana atopero akwaar kiiya, kimera. Elogakinos ngakan atalakaros.

¹⁹Emam lokile kang anawi. Eperorit nikalonan.

²⁰Iwokorit ngaropiyae nakaalak, eperori ngiukio ngiarei tobongu.”

²¹Kimaima aberu ngina esorokit ngolo a ngakiro anakaalak, tacham esorokit ngakiro kotere akituk nakaabon.

²²Atipei kiwapak esorokit aberu loger a emong alo erikitoe akingol, loger a agete ana eporokini loloit,

²³tanang ichumio a emal lotau. Ekoni ngesi ikeny ni ekeri loloit. Nyeyeni atamar edikino atoani.

²⁴Tokona bocha, talokoku, topupokisi. Todetasi ngaki kiirasi ngakiro na alimuni.

²⁵Tochoite etau kon ereikin lorotin keng. Nyiiwoliyo kiwap ngirotin keng.

²⁶Abuko ngesi ngikiliok lukaalak. Ee robo, elalak lu arikoki ngesi akitu, nyimarun.

²⁷Erai akai keng erot lo elosere lokatoak. Ee robo, erai erot longedakinet nakitu.