Read turkana Ngakamatak 8 Bible Online

Ngakamatak 8 - turkana bible

Ngakamatak 8

¹ Topupokisi! Enyaritoi aosou. Irema achwaanu.

²Anaitae a ngimukur, alo diyete erukudi, ewei ani iriamitotor ngirukudi.

³Ni elomunere lore alo diyete ngidorin, enyaritoi aosou ebala,

⁴“Kanyarit esi ngitunga, anyarit itwaan daang ni eyei nakwap.

⁵Esi ngikabangabangae, toosutu. Esi ngikawaewae, topupokisi lokojokon.

⁶Topupokisi ngakiro kang naajokak, itorunito na eriyan nakituk kang.

⁷Eruoro ayong na iteni, aremokino ayong alioko.

⁸Etenooko na itorunito nakituk kang daang, emam tani apei na erai alioko kori na emodeana.

⁹Nyemadiak ani eyei ngini echwaana. Eraakasi na iyookino ani eyei ngini kooson.

¹⁰Toseu ngakichikichiket kang, akidwang aseun ngaropiyae, toseu aosou akidwang egolit loajokon noi.

¹¹Ayong aosou, ajok akidwang ngamoru nakaalak a ngaropiyae. Emam ibore nikiminarit iyong daang ni kesikwaanere ayong.

¹²Ayong aosou, ayeni ngakiro. Achwaana nabo aos.

¹³Akiker Ekapolon Akuj ngesi aremokin naaronok. Aremokino ayong ekinis ka ngiwog, ka ngakiro naaronok ta alioko.

¹⁴Aree ayong ngakiro sodi atosubak, achwaana nabo agogong.

¹⁵Engarakinit ayong ngikapolok apolokin akwap, ka adungun ngitalio lu eriyan.

¹⁶Ngikarikok a ngakwapea daang, epolokinito ani engarakinitor ayong. Engarakinit ngikapolok ka ngikajakaanak aapei.

¹⁷Amina ayong ngulu kaminasi ayong. Ngulu kasakete ayong lokojokon, kaanyunete.

¹⁸Atingit ayong ebari ka arimatoi, ee robo, ebari lokajik ka apiaro.

¹⁹Ejok ageor kang akidwang egolit, akidwang tani egolit loajokon. Ejok idwangit tani akwangat na eseunitae.

²⁰Etenoono eboyor kang, ewapit ayong nguna eriyan.

²¹ Etabareene ayong lu kaminasi ayong, eleleb ngichuei kech ngaropiyae.

²²“Kasubuni kolong Ekapolon Akuj ayong ekingaren a ibore kadaang. Ayong engareni alotichisio keng kadaang, alu kolong a angorot kanuan.

²³Kasubunio ayong kolong a angorot, ekingaren jik, eringa akwap nyesubuna.

²⁴Kedounio ayong eringa tani nganamea nyepena, amam tani ngileleae a ngakipi.

²⁵Kedounio ayong eringa ngimoru, eringa ngimukur nyitowaa,

²⁶eringa Akuj nyesubuna akwap ka ngamanat na eyakasi nakwap, kori achudunet a ngalup ana ekingaren.

²⁷Ayei ayong na asubunea ngesi adis, na etorwarea atorite alokidiama anam naapolon,

²⁸na ewaakinea ngidowon nadis, tangau ngileleae a ngakipi,

²⁹todungok ngakipi a nganamea tokurupupuut sodi nyiiporosi ni alimunit ngesi. Ayei ayong edupakini Akuj ngapirio a akwap.

³⁰Kibakit ayong ka ngesi loger a ekadukon alokunonoit.[3] Ayong etalakarit Akuj jiik.

³¹Alakara ayong anakwap ana alomito ngitunga, kajoikinito ngitunga.

³²“Tokona bocha, talokoku, topupokisi. Epiaritae ngulu iwapito ngirotin kang.

³³Kiirasi nakitatamio. Toosutu nyiilagalagakis.

³⁴Epiaritae itwaan ni epupi ngakiro kang, itwaan ni ibooyi alokidor kang akolongit daang, idarit alokidor a awi kang.

³⁵Kainyo itwaan nikaanyuni ayong, aanyu akiyar, nabo echamuni Ekapolon Akuj ngesi.

³⁶Itwaan ni nyakaanyuni ayong, ewan ngesi bon. Daang lu karemokino ayong, eminasi akitu.”