Read turkana Ngakamatak 9 Bible Online

Ngakamatak 9 - turkana bible

Ngakamatak 9

¹Aduki aosou akai keng, tosubak ngapirio ngakan-kaarei.

²Aar ngibaren lu enyamio, emorik emuna keng ka ngikito luadwarak, ewaak akimuj lomeesa.

³Amea ngakasubak etich keng, anyaraun ngitunga ni ikeuna alore.

⁴“Tolomutu, esi lu emam ibore iyenete!” Tolimok lubaang tama,

⁵“Potu tanyama akimuj kang, tamata emuna lo etodwarit ayong.

⁶Totiakas ka lu nyeyenete ngakiro, toyara. Kiwapa erot lo a achwaanu.”

⁷Itwaan ni itenikini itwaan nia ngimeny, eriamuni ngileech. Itwaan ni ikilakini itwaan niaronon, ewan bon.

⁸Nyiikilak itwaan nia ngimeny, kiremokin iyong. Kikilak itwaan nikooson, kiminakini iyong.

⁹Ani kichikichik iyong itwaan nikooson, eosuni noi. Ani kitatam iyong itwaan ni etenoono, iatakin achwaanu keng.

¹⁰ Akerit Ekapolon Akuj ngesi erai akisiakin a aosou. Akiyen ngolo italeuno ngesi erai achwaanu.

¹¹Iatakini aosou ngirwa kon, iatakini ngikaru lu iyarea iyong.

¹²Ani kios iyong, iyong ilope ingarakin. Ani kimenya iyong aosou, iyong ilope iriamuni ngichan.

¹³Echalana aberu nabaang, emam ibore eyeni, nabo nyitimete ngakiro.

¹⁴Ibooyi alokidor a akai keng, kori iboyonokin lokicholongo, lu eyakasi ni ikeuna alore.

¹⁵Tanyara ngitunga lu itoruuniyete neni, lu egeal nikech eloose.

¹⁶Tama, “Tolomutu esi lu emam ibore iyenete!” Tolimok itwaan nibaang tama,

¹⁷“Ebobok ngakipi na ekokoyo, ejok amugati na enyamio edukitae.”

¹⁸Ngikiliok lu isuruori ngesi, nyeyenete atamar eyei akitu neni, nyeyenete atamar ngitunga lu alomasi neni, alomasi lokatoak.