Read turkana Eketataman 1 Bible Online

Eketataman 1 - turkana bible

Eketataman 1

¹Eraakasi ngakiro nugu ngaka eketataman alo arai lokookeng a Daudi, alo kolong arai ekapolon alo Yerusalem.

²Erai pas, erai pas, ebala eketataman! Erai ibore daang pas!

³Nyoni eriamuni itwaan alotich kadaang, alo ichidaritor ngakiinyir kane anakwap?

⁴Edaun alesit apei, bu nache, tarai erubi akwap jik.

⁵Ipiripiruuni akolong sodi todooyo, kikirikiraar tobongo ni ipiripiruunea.

⁶Ekutari ekuwam kuju, kirimo toten kwap, tokuta irimi, tobongok nabo ekirime lopei ngolo.

⁷Eremete ngangololin daang anam, nakaneni nyilelebun anam jik. Ni eremete ngangololin, ngesi nabo isiakineta alelear.

⁸Eraakasi ngakiro daang ngaketuburunak, aburun naationon na nyisisao. Nyeupi akongu akitere, kori nyeupi akit akipup.

⁹Nguna kolong ayakasi, kesi epete. Nguna kolong asubakin kesi esubakinio. Emam ibore nikitetet eyei nakwap.

¹⁰Etamanarete ngitunga, “Kingolikisi, ikitetet ibore en.” Kaai? Ayei kolong sek a angorot.

¹¹Emam itwaan itamuni na kolong asubakinosi kanuan. Kori emam monan itwaan itamuni na esubakinosi, napei tokona jik tanang monan.

¹²Ayong eketataman, arai kolong ekapolon a Isirael alo Yerusalem.

¹³Atolemun ayong angichun ka akiyen ngakiro daang na esubasi anakwap kana. Ekoe, etioko ngichan einakinit Akuj ngitunga!

¹⁴Engolik ayong ngakiro daang na esubio anakwap. Kalimokinit atamar eraakasi daang pas. Ikwaan ka akirisit ekuwam.

¹⁵ Nyipedori akitorwaar ibore ni ekudokina, kori nyimarun ibore ni nyetakani.

¹⁶Etama ayong alotau atama, “Aanyu ayong aosou nakaalan noi akidwang ngikapolok daang lukengarenete ayong alo Yerusalem. Ayen ayong aosou ka achwaanu lokojokon.”

¹⁷Abu atolemun akiyen ibore ni etiakit aosou ka abaangu, ka ibore ni etiakit achwaanu ka ngikerep. Atogipa atamar abe edikino eliwor ekuwam erisit.

¹⁸Kainyo naiatakinor aosou kon, kiatakin tani ngichan kon. Naiatakinor achwaanu kon, kiatakin tani apipilu.