Read turkana Eketataman 10 Bible Online

Eketataman 10 - turkana bible

Eketataman 10

¹Itobosunete ngichuch lu etoakito akimiet nakaakunyon, ikisari abaangu nadiochichi aosou ka ekipur.

²Itwaan nikooson, erii cha jik anakiro ana etenooko, nakaneni itwaan nibaang, erii cha jik anakiro ana nyetenooko.

³Eyenio ekabangabangat tani alorot, kainyo elimorit ilope atamar abangaana.

⁴Ani kengo ekapolon kitongoik iyong, wara nyiisik etich, kainyo erimakinio ngasechesea naaronok erai kililing[7] iyong.

⁵Eyei akiroit naaronon na engolik ayong anakwap, na erai ngikapolok esubete.

⁶Ngikabangabangae kesi itiliwonorio ngikapolok sodi nyeemisikin ngikabarak.

⁷Engolik ayong ngikedalak edokito ngangolei toloose ngikarikok a ngakejen loger a ngikedalak.

⁸ Itwaan ni eboki akipany, echakakin nakipany. Itwaan ni eukori awas, ekonyi emun.

⁹Itwaan ni ibesi ngamoru, ewanete ngamoru. Itwaan ni eyepi ngakito, ewanete ngakito.

¹⁰Ani kengingi aep, sodi nyiipenar, erai mati kirichakin iyong a ngikilinga kon ngesi isubea etich a aep kangina.

¹¹Ani kekony emun lo nyitapataniunitae itwaan, emam nabo ibore esakere akitapatanuun emun ngolo.

¹²Eanyuni ekooson ekipur, kotere ngakiro na iruoro ngesi. Inyasunete ekabangabangat ngakiro keng a ilope.

¹³Napei isiakinea ekabangabangat ekiruor, kiruorik abaangu. Ani erumori ekiruor, kiruorik ngikerep luaronok.

¹⁴Italalae ekabangabangat ngakiro. Emam itwaan eyeni nguna isidiunosi. Ngae epedori alimokin ngesi nguna isidiunosi?

¹⁵Ituburuni etich a ekabangabangat ilope, sodi tongopik ngesi erot lo ebongio nawi.

¹⁶Oitiakoi! Abe etioko nginyas ianyuni iyong akwap! Abe esorokit erai ekapolon kon, nabo imujete ngikarikok kon, akimuj nakaalan akwaar kiiya kiwala.

¹⁷Akwap, ijok iyong, kerai ekapolon kon itwaan ni eyeni etich keng, kimujete ngikarikok kon esaa lo itemokino imujeta, taanyuneta ngikilinga, meere kisirakarotor epurot!

¹⁸Kotere akalanyanut a itwaan, eukor akai keng. Kotere ngileleny a itwaan, elakakini kidiama akai keng ngakipi.

¹⁹Erai akimuj aka akiena, erai emuna lo kitalakari, ngaropiyae bocha erumorete ngakiro daang.

²⁰Wara nyiichen ekapolon, tani alotau kon. Wara nyiichen ekabaran, tani anamaniyat kon anaperot. Epedori tani ikeny apororea ngakiro kon sodi tolimo na iruoro iyong.