Read turkana Eketataman 11 Bible Online

Eketataman 11 - turkana bible

Eketataman 11

¹Tosubea ngaropiyae kon emuchuruseenu anakwap anagela, sodi toriam kiatakin ekisidi.

²Totiakak ebari kon lowaitin lukaalak, kainyo nyiyenanar naaronok, na iriamunotor kane anakwap.

³Ani kilelebun ngakipi lodowon, ibulakinete ngakipi kech nalup. Ani keukokin ekitoe kwap kori kuju, idongi eperi ani tete aukokin.

⁴Itwaan ni idarit ekuwam edaun, nyitakini ngikinyam. Ngini idarit ngidowon iealarosi, nyelemi amana.

⁵Akuj ngesi asubuni ibore daang. Nyipedori iyong akiyen ngakiro na esubi Akuj, loger lo nyipedorea akiyen eger lo isiakinea akiyar a ikoku anakook a aberu ana epoti.

⁶Kitak ngikinyam kon nataparach. Kitak tani ebong, kainyo nyiyeni atamar erupunete ejok kori mam, nabo nyiyeni atamar alu erupunete ejok, lua ataparach kori luka ebong, kori daang.

⁷Ejok akicha, nabo ejoikinit ngakonyen akisemere akicha a akolong.

⁸Ejoikinit itwaan ni ayar ngikaru lukaalak elakar alokaru kangulu, itamunit atamar elalak moi ngikaru lua akitu, taraakas na isidiuno daang pas.

⁹Iyong esorokit, talakar alosorokane kon. Tolomak amera eringa isorokana. Kiwap ngakiro a etau kon ka na iteete ngakonyen kon. Nakaneni toyen atamar anakiro kanu kadaang etubi Akuj ngakiro kon itemem ka ngakiro na isub iyong daang.

¹⁰Wara nyialolong, tolema ariaba anakwaan kon, kainyo meere asorokanut aka ngirwa alukaalak.