Read turkana Eketataman 12 Bible Online

Eketataman 12 - turkana bible

Eketataman 12

¹Kitam Akasubunan[8] kon eringa isorokana, eringa ngirwa luaronok nyepona. Aapuut ngikaru lu ilimunio iyong kona, “Nyeketalakarito ayong ngiboro lugu!”

²Ngirwa ngulu kesi lu enyikinyiketo akolong, ka elap ta ngikanyer, nabo nyengopiarete ngidowon lua akiru.

³Ngirwa lu emaranikineta ngakan kon na kiyokiyete iyong. Tolilimiyosi ngakejen kon na tokona eya ngikilinga. Ekidiokuunete ngikel kitokuruwo anyakaikin akimuj. Toribok ngakonyen tojongoto akitere ejok.

⁴Ekinimanete ngaki kon nyiirasi echale alorot. Nyiirari erue a akiries kori ngieosio eeoi, nakaneni kitekienyuni iyong tani erue a ikeny.

⁵Iemi iyong alosit lowaitin lu ikeuna, toem tani alosit alorot. Pena ngakorwo nakou. Kitokuruwo alosit, tongopik akwaan ekimue a ibore kadaang. Yaarae itwaan ni iangarea jik, sodi kigoro ngitunga alorotin tosutonokis.

⁶Ngesi engedar erikot lokwangat, kimasun ataa na egolit tobwang, tonged auno na eokere alokare, sodi kiealar etuo a ngakipi.

⁷Ebongete ngawat yok napua, sodi tobong akianget a akiyar nia Akuj, ana kolong kiinakini.

⁸Ebala eketataman, pas, pas, eraakasi daang pas.

⁹Ani aloger araakar eketataman itwaan nikooson, abu toliwor jiik itatami ngitunga ngakiro na ayeni ngesi. Kisoma ngesi ngakamatak sodi torek a ekunonoonu.

¹⁰Tasak eketataman ngakiro naketalakarak, sodi kigir ngakiro na etenooko na iteni.

¹¹Ikote ngakiro a ngitunga alukoosok ngaburoi naitayek na ereuniyere ngamesekin. Ikote ngakamatak na idiasitae ngapirio na itirokinitae nalup. Akuj ngesi kiinakini, na erai ngesi bon erai ekeyokon yok kadaang.

¹²Lokoku, eyei akiroit ache na ejoikinit ichoikini! Emam akigir ngakitabea esal, nabo kituburuni akisomare lokojokon, kituburuni noi.

¹³Arumoret kanguna kadaang, eyei akiroit apei. Toker Akuj, kiwap ngakiro na edungunit ngesi. Kainyo daang na kolong asubunere itwaan nguna.

¹⁴Etubi Akuj ngakiro nakisubi ngoni daang, kejokak kori keroko, tani ngamunonoe.