Read turkana Eketataman 2 Bible Online

Eketataman 2 - turkana bible

Eketataman 2

¹Etama ayong alotau atama, “Kimiekinae eir ajako atalakar.” Nakaneni abu ataanyu atamar eraakasi nguna dang pas.

²Atama akiena, “Erai ngikerep.” Ani alakara, “Nyo kitaanyuni alakara?”

³ Abu etama lokojokon. Ani a ekimue alo asakea aanyun aosou, abu etama ngakiro nugu, atotiaku atamar atamat emuna atomerakin. Atotiaku nabo atamar ewapi abangaanut ataanyunea kerai na ejoikinit itwaan esubi nguna, alorwa aludikidio eyakar nakwap kalu.

⁴Abu atosub naapolok. Atoduk ngakais kang ka akitare ngamanat a ngimusabib.

⁵Abu etak ngamanat a ageor ka ngamanat nache, sodi etak ageor daang nagelagela.

⁶Atochilu ngabwelin na abukio ngakipi namanat.

⁷Atogiel ngikedalak lukaalak luberu ka lukiliok, toyakasi lu edoikinio nawi kang. Abarit ngibaren lukaalak, ngisipaan a ngaatuk ka ngamesekin nakaalak, akidwang itwaan iche daang ni alom Yerusalem nakanuan.

⁸ Atotukok ngaropiyae ka egolit lo ayauniyo anapolosio a ngakwapea ana apolokinit ayong. Kaeonokinete ayong ngikiliok ka ngaberu ketalakasi. Arikit ngaberu daang nacha kemuit ayong akirik.

⁹Kanguna, abu atoliwor lokayenikinitae akidwang daang lukengarenete ayong alo Yerusalem. Atorubak arai lokooson.

¹⁰Ibore nicha aminari ngakonyen kang, abu nyaalakak. Emam alakara abu ayong emik akwaan kang. Ewogar ayong ibore cha daang ni asubi ayong kainyo ngesi etachakin nakiinyir kang.

¹¹Ani erumor etama daang na asubak ayong ka eger lo echidaritor ngakiinyir. Atoyen atamar eraakasi daang pas. Ikwaan ka akirisit ekuwam, emam ibore ianyuni anakwap.

¹²Sodi esiak akitam eger a aosou, ka ngikerep ta abaangu. Nyo epedori ekapolon lo isidiun akisub? Erai ngakiro napei kolong asubete lu engarenete.

¹³Ekoe, ayen atamar ejok aosou akidwang abaangu, loger lo ejokia akicha akidwang aribu.

¹⁴Eyakasi itwaan nikooson ngakonyen na iteo ni elosi, nakaneni nyikoni ekabangabangat neni. Atoyen ayong atamar ngakiro ngapei idarito kesi daang.

¹⁵Etama alotau atama, “Ngichan lupei eanyunito ngikabangabangae kesi aanyuni ayong dang. Ani toliwor nyo aanyu ayong anaosou kang?” Atatachu atama, “Emam. Eraakasi nugu dang pas.”

¹⁶Kainyo emam itwaan itamuni itwaan nikooson nabo emam itwaan itamuni itwaan nibaang. Alorwa alu isidiuno, imuriarosi ngakiro aluarei kangulu. Kitoaki ngoni daang, kirai ekooson kori ekabangabangat.

¹⁷Aloger kangolo, aremokin ayong eboyor. Kainyo daang na esubasi anakwap, ngichan make kainunito. Eraakasi daang pas. Ikwaan ka akirisit ekuwam.

¹⁸Atoremokin ayong etich kang daang lo kolong asubi ayong kanege anakwap, kainyo aisikinea moi ayong itwaan niche ni ilunyokin nados kang.

¹⁹Ngae eyeni keliwor itwaan ngini ekooson kori ekabangabangat? Kaneni dang, irumi ngesi ibore ngini daang. Ibore ni kolong echidaritor ayong ngakiinyir atosubea etich a aosou anakwap kana. Eraakasi daang pas.

²⁰Ani etamari nakolong echidaritor ngakiinyir kanege anakwap, abu atajal daang.

²¹Kainyo esubeene itwaan etich a aosou keng, ka achwaanu ta ekunonoonu, ani erumor toliwor itwaan niche ni nyichidara ngakiinyir ngesi irumi ibore niajokon a etich kangolo talakaror. Erai pas, erono akiroit ngina noi!

²²Nyoni eriamuni itwaan alotich keng kadaang ka ngakiinyir na ichidarit anakwap?

²³ Erai eboyor keng daang eka ngichan. Erai akisub etich dang akichana. Tani nakwaare nyianganarete ngitamen keng! Eraakasi nguna dang pas.

²⁴Ibore niajokon noi anitwaan ngesi akimuj, tamat, sodi talakar alotich keng. Ayen atamar eponito nguna dang ani a Akuj.

²⁵Kainyo, ai nabo wache pearai nia Akuj ianyunea iyong ibore ni inyami, talakaror?

²⁶ Einanakini Akuj itwaan ni emina ngesi aosou, ka achwaanu ta alakara. Nakaneni itusubi ngesi ngikalemak etich lo a akilem ka akichun, ani ibore ni eanyunete kesi, nakinae ngulu eminasi Akuj. Eraakasi nguna dang pas. Ikwaan ka akirisit ekuwam.