Read turkana Eketataman 3 Bible Online

Eketataman 3 - turkana bible

Eketataman 3

¹Ereat Akuj ngakiro daang tosubas alosaa alo etiakunit ngesi.

²Ereat esaa lo kidounere ka lo itoanea, esaa lo itaare ka lo elemere.

³Ereat esaa lo earere ka lo itangalekinere, esaa lo eyatarere ka lo edukere.

⁴Ereat esaa lo iuteere ka lo ekianare, esaa lo ialolongere ka lo idongaare.

⁵Ereat esaa lo imasanarere ngamoru ka lo echunere, esaa lo enuare ka lo nyenuare.

⁶Ereat esaa lo esakere ka lo echakarere, esaa lo ikachakinitere ka lo imasarere.

⁷Ereat esaa lo echilere ka lo edonyere, esaa lo ililingere ka lo iruorore.

⁸Ereat esaa lo eminare ka lo eremitere, esaa lo a ejie ka lo ekisil.

⁹Nyoni eanyuni itwaan alotich keng kadaang?

¹⁰Ayeni etich loationon lo ainaki Akuj ngitunga.

¹¹Atiakaki ngesi ibore daang esaa keng lo itemokino. Ainaki ngesi ngitunga ekimue lo eyeneta na isidiuno, nakaneni emik ngesi kesi akiyen lokojokon ngakiro na esubi ngesi.

¹²Ayen ayong atamar na ejoikina anitwaan ngesi alakar ka akiboi aniajokon eringa eyari.

¹³Ejoikinit ngoni daang kimuji, atamata atalakaros kotere etich daang lokisubi. Erai ibore ngini daang ainakinet a Akuj.

¹⁴Ayeni atamar erubi ibore daang ni esubi Akuj. Emam ibore epedori itwaan akiatakin kori alemar. Asubaki Akuj kongina sodi atokereta ngoni ngesi.

¹⁵Ibore ni esubakin tokona, ngesi ni kolong asubakin. Ibore ni moi esubakin ngesi ni kolong asubakin. Ebongonokini Akuj asubanakin ibore nipei ngini jiik.

¹⁶Ani eyakasi daang, engolik anakwap kana atamar ni esakitere ngakiro na iteni ka na eriyan esubatar, neni ngesi esubatar naaronok.

¹⁷Etama ayong alotau atama, “Ani bo ikoni dang, irirae Akuj luajokak ka luaronok aapei kainyo esuba ibore daang a esaa keng alo etiakunitae.”

¹⁸Atoyen ayong atamar kiroanari ngoni Akuj kidodikinea atamar kikwaan ngoni ka ngitieng.

¹⁹Kainyo erai esal a itwaan ka lo a etiengit epei. Etoane lo etoani itwaan ngesi etoani etiengit dang. Erai akianga kech apei. Emam ibore idwangitor itwaan ngitieng. Eraakasi daang pas.

²⁰Eloose kesi daang wapei. Eponito daang anapua sodi tobongosi napua.

²¹Ngae eyeni keloseene etau a itwaan kidiama, sodi tolot lo a etiengit tooma nalup?

²²Atoyen ayong atamar emam ibore iche ajokon ejoikinit itwaan esubi pearai alakar kotere ibore ni eriamunit alotich keng. Emam ibore iche kipedori ngoni akisub.[1] Emam erot eyenea itwaan ngakiro na esubakinosi na etoanea.