Read turkana Eketataman 4 Bible Online

Eketataman 4 - turkana bible

Eketataman 4

¹Ani erumor engolik aronis daang na esubio kane anakwap. Igorosi lu ichiekiaritae nakaneni emam itwaan isililingi kesi. Emam itwaan ingarakini kesi kainyo ibakito lu eyakasi napolou ka ngikechiakiarak.

²Kating ayong etereku kotere lu atoaka, kainyo eyei lukatoak apiaro akidwang lu eyarete.

³Nakaneni lu epiaritae noi kesi lu eringa nyidouno akidwang ngikatoak ka lu eyarete, kainyo eringa kesi nyeanyungara naaronok daang esubasi kane anakwap.

⁴Ayen tani atamar nyo irichatar ngitunga alotichisio kech. Erai kotere ni etingitor itwaan etereku kotere ekidunyet keng. Nakaneni erai nguna pas. Ikwaan ka akirisit ekuwam.

⁵Ebeyo, ebangaana itwaan ni erwaarit nyesubi etich, kotere ngakiro nguna, eriyori erogo.

⁶Kaneni dang, ejoikinit itingit ibore nidiochichi tamam ngakiro kichanito akidwang akakaunit ngiboro a ngakan kadaang isaki akirumun ekuwam.

⁷Agipa nabo akiroit ache na erai pas anakwap.

⁸Itwaan ni erai ipei bon, emam lokookeng kori lokaatokeng, kiricha jiik alotich. Nyeupi ngesi jik ebari, sodi nyiingis tama, “Ngae mono erichar ayong asubea etich, emikitor akwaan kang alakara?” Eraakasi nabo nguna dang pas. Erai eboyor loaronon.

⁹Ejok aliwor ngiarei akidwang aliwor itwaan ipei, kainyo eriamunete luarei ebachit a ngakiinyir kech.

¹⁰Kainyo na edakaror ipei, kitonyou niche. Wae, ekoe, ikokini ni erai ipei na edakaror ai? Na edakaror, emam niche ni itonyouni.

¹¹Kongina pei, na inapakinotor ngitunga ngiarei wapei, emokunete. Ani bo itwaan ipei, ikokini itomonun ai?

¹²Epedori emoit akidwang itwaan ipei. Nakaneni ani eraakasi ngitunga ngiarei, itemunete kesi emoit, kidwanga. Auno na idanyitae a ngirotin a nguuni, nyebeben angeda.

¹³Ejok esorokit lokooson tani kiboosit akidwang ekapolon lomojong tabangaana, nyeepupi ngakiro na isuruorio,

¹⁴tani bo kolong kerai lojela alomunea toliwor ekapolon, kori tani kolong kidounitoe iboosit toliwor ekapolon.

¹⁵Engolik ayong ngitunga daang lu eyakasi nakwap atamar kiding kech eyei esorokit lo ilunyokin nados a ekapolon.

¹⁶Emam esal eyei lokimar a ngitunga alu epolokinit ekapolon. Epolokinit ngesi daang. Tani ikoni neni, ngulu idounio ekisidi, nyelakarosi kotere etich keng. Eraakasi nguna dang pas. Ikwaan ka akirisit ekuwam.