Read turkana Eketataman 5 Bible Online

Eketataman 5 - turkana bible

Eketataman 5

¹Tochoikin na ilosio kai a Akuj. Ejok alosit kai a Akuj topupok ngakitatamet akidwang alosit akipeyore loger a ngikabangabangae, alu nyeyenete naajokak ka naaronok.

²Nyiingamanakin ekiruor. Wara nyiikoponokin alimokin Akuj ngakichikakinet, kainyo eyei Akuj nadis toyei iyong nakwap. Kotere nguna nyiitalala ngakiro na iruoro iyong.

³Naichanakinor iyong, ipedori akirujare ngakiro naaronok. Ani kiruor iyong ngakiro nakaalak, ipedori tolim ngache na abangaanut.

⁴Ani kikongok iyong Akuj atamar isubakini ibore, nyiitinenik asubakin. Kainyo nyelakara Akuj kotere ngikabangabangae. Tosubak ngakiro nguna ikongok iyong Akuj atamar isubakini.

⁵Ejok akililing nyiikong atamar isubakini ibore, akidwang alimun, ani erumor nyiisubak.

⁶Wara akituk kon nyikilomak nakisech. Wara nyiilimok emeanara a Akuj atamar peiyechakini akisech. Kotere nyo itongoikinor iyong Akuj sodi kinyasu ngesi etich kon?

⁷ Nyekachitae tani kiruja iyong ngakiro nakaalak, kori tosub etich lo erai pas ka akitalalare ngakiro alokiruor kon. Akiroit nateno ngesi akerit Akuj.

⁸Ani kingolik iyong arieng ichiekiarit lu iboosit nyeesubea na eriyan, nabo nyeinak nguna ejoikinit eanyunete, wara nyiiumwok. Ekapolon daang, eyei nabo lo epolokinit ngesi, toyakasi nabo lu epolokinito kesi daang.

⁹Tani ikoni neni dang, eraakasi ngalemet a akwap ngaka daang. Igieno ekapolon dang ngalemet.

¹⁰Ani kimina iyong ngaropiyae, nyikiupete. Ani kiburakinit iyong ebarit, nyianyuni nguna isaki daang. Eraakasi daang pas.

¹¹Na ibarea iyong noi, talalaketa ngakookies itani. Ibore ni eupi ilope ngesi akitere toyen atamar arai ekabaran.

¹²Ebobok ngaju a ekasuban etich, kerai akimuj nadiochichi enyamit kori nakaalan. Nakaneni nyejotoor ekabaran ani ialolongio kotere alalau a ebari keng.

¹³Eyakasi nabo nakaronok noi na engolik ayong kanege anakwap. Ikachakini itwaan ngaropiyae esaki kingarakinor ngirwa ngiche lu iitanea,[2]

¹⁴tobukor ngaropiyae nguna a erot a eche aronon, tongopik ngesi ibore eisikinea ngide keng.

¹⁵Erotokini itwaan anakwap emuner loger lokolong edounere. Emam ibore tani edit ni elemari ngesi alotich kadaang alo ichidaritor ngakiinyir.

¹⁶Eraakasi nguna daang naaronok noi. Ebongi ngesi loger lo kolong abunio. Echida ngesi ngakiinyir pas, kotere akirisit ekuwam.

¹⁷ Erikak ngesi ngirwa a eboyor keng daang naribu ka esinyoi,[3] ka ngichan, ka ngidekesinei ta angoit.

¹⁸Nugu kesi abu atoyen, atamar ibore niajokon ni epedori itwaan akisub ngesi akimuj, tamat ka alakar kotere ibore ni ariamu alotich keng anakwap, alorwa aludikidio iteyaritor Akuj. Kainyo nguna kesi etiakakinitae itwaan.

¹⁹Ani keinaki Akuj itwaan ebari ka ngiboro, ani erumor kimiek ngesi elakaror, ejoikinit itwaan ngini ebuakini Akuj alakara, toyarea ibore ni ariamuni a ngakiinyir keng elakara. Erai ibore ngini ainakinet a Akuj.

²⁰Kona achamakinea Akuj ngesi elakar, nyejoikinit ngesi eriaba kotere ni ekidiokioto ngirwa lu eyarea.