Read turkana Eketataman 6 Bible Online

Eketataman 6 - turkana bible

Eketataman 6

¹Agipa ayong akiroit nakaronon anakwap, na ichanit ngitunga.

²Einakini Akuj itwaan iche ebari, ka arimatoi, ka ngiboro ta ibore cha daang ni iitanit ngesi. Nakaneni nyimiekini ngesi toyarea ebari ngolo. Togelakin moi itwaan eyarea. Eraakasi nguna pas. Nyitemokino nguna jik.

³Epedori itwaan iche aurere ngide amiat apei, nabo toyar ngesi nikooyen. Nakaneni ani pekelakar ngesi aloboyor keng, nabo nyeenuk kotere arimatoi, alimunit ayong atamar ejok ikoku ni idounio etoanit akidwang itwaan ngini.

⁴Emam ibore ajokon eriamuni ikoku ni idounio etoanit, kainyo ikalomaran naribu tongopik neni.

⁵Nabo dang, nyingolikina ikoku ngini akicha a akolong kori nyeyeni atamar ikoni eboyor ai. Nakaneni ariamu akiangar

⁶akidwang itwaan ni nyelakara aloboyor keng, tani bo keyarit ngikaru ngabunge ngaarei. Ani bo ikoni dang, eloose kesi daang wapei.

⁷Erai etich daang lo ichidaritor itwaan ngakiinyir ekisimwonet akook, nakaneni nyesaluni ekimue a akimuj jik.

⁸Nyo ibore ajokon idwangitor ekooson ekabangabangat? Nyo ibore ajokon eriamuni ekebootonit erai keyen eger a eboyor.

⁹Eraakasi pas. Ikwaan ka akirisit ekuwam. Ejok kiupi ibore ni itingit akidwang akisak iche.

¹⁰Ngakiro daang na esubasi, atiakunio kolong a angorot atamar esubakinosi. Nabo kiyeni ngoni daang atamar nyepedori itwaan[4] apega ka itwaan ni idwangit ngesi a ngikilinga.

¹¹Eger lo irichar iyong apega, erai pas. Nyo ikajokon ianyuni iyong?

¹²Kainyo ngae eyeni ibore ni ejok kotere itwaan, alorwa aludikidio a eboyor keng, alo erai pas, alo elosi loger a etorube? Ikokini itwaan eyeni ibore ni esubakin kane anakwap ketoana kerumor ai?