Read turkana Eketataman 7 Bible Online

Eketataman 7 - turkana bible

Eketataman 7

¹ Ejok ekipur ajokon, akidwang akimiet nakaakunyon nakaalan a ngaropiyae. Ejok akolongit na etoanea itwaan, akidwang akolongit na idounere.

²Ejok alosit ni igorore ekatoan, akidwang alosit ni imujere a alakara, kainyo ejoikinit lu eyarete, itamunito atamar kidarit ngoni daang akitu.

³Ejok akialolong akidwang akiena, kainyo ereet lo ebilakina, italakari etau.

⁴Itwaan ni itami jiik ngakiro a alakara, erai ekabangabangat. Itami ekooson ngakiro a akitu.

⁵Ejok akiirar akikilakino a ngitunga alukoosok, akidwang akipup ekipur a ngikabangabangae.

⁶Ikwaan akiena a ekabangabangat ka erue a ngiikwa na enomiarea akim. Eraakasi nguna dang pas.

⁷Naichiakiarea itwaan nikooson luche, ekwaanikin ngesi ka ekabangabangat. Ani kidiau iyong ibore ni kidiekitere, inyasu iyong ngitamen kon.

⁸Ejok esal a ibore, akidwang akisiakinet keng. Ejok etau lo enaikinit akidwang lo iwoga.

⁹ Wara nyikirerengik angoit, kainyo erai ngiman a angoit abangaanut.

¹⁰Wara nyiingis tama, “Nyo bo etojokit ngirwa lu kolong ngorok akidwang ngirwa lugu?” Nyerai akingita kongina aosou.

¹¹Ejok aosou ikwaan ka ibore nikiruma, ejoikinit itwaan ni eyari daang eos.

¹²Epedori aosou akiyok iyong loger lokiyokiyeto ngaropiyae. Ibooyi itwaan nikooson isilit, ajokis a aosou ngina.

¹³Kitama etich a Akuj. Ngae epedori akitorwaar ibore ni akudoki Akuj?

¹⁴Talakar alorwa alu ajako. Ani ngirwa lua ngichan, kitamu ngakiro nugu, atamar Akuj eyaunit ajako ka ngichan. Nyepedori itwaan akiyen ibore ni esubakin ekisidi kanguna.

¹⁵Aloboyor kang alo erai pas, engolik ngakiro daang. Epedori itwaan niajokon atoanere tani kejok, sodi toyar itwaan niaronon nikooyen tani kerono.

¹⁶Wara robo nyiijoker noi kori nyiioser noi. Nyo edikino iarar bon?

¹⁷Nabo dang, wara nyiironer noi, kori nyiibangaaner. Nyo edikino itoanea eringa ngirwa kon?

¹⁸Min nakidingos a ngakiro anaarei, ajokis ka aronis. Itwaan ni ekerit Akuj, ejokearosi ngakiro keng daang.

¹⁹Epedori aosou asubea itwaan ngakiro nakaalak akidwang ngakiro na epedorete ngikapolok ngitomon asubea ere.

²⁰Iteni emam itwaan ajokon anakwap ni esubi naajokak jiik, toliwor emam ibore ichwangakini.

²¹Nyipupeene ngakiro daang na iruorosi ngitunga, ani kemam, iirari ekedalan kon kiyenyi,

²²toyeni bo iyong ilope atamar iyeny iyong ngitunga luche ngakiyenyet nakaalak.

²³Aroi kolong ayong ngakiro nguna a aosou kang. Sodi atama, “Asaki atoliwor itwaan nikooson.” Nakaneni elona aosou noi anikang.

²⁴Ikokini itwaan eyeni eger a eboyor ai? Etiono akiroit ngina noi aniyok, nyebeben akiyen.

²⁵Abu ayong atolemun akiyen, ka akingich ta akisak aosou ka eger a ngakiro ana tokona esubasi, ta akiyen aronis ka abangaanut a ekiwaanu.

²⁶Abu ataanyu ibore ipei nikaapilan noi akidwang akitu, ngesi aberu. Isurumi amina keng itwaan loger a eloit kori epuute. Kirwakin a ngakan keng loger a ngiriko. Ebuchar ekile lo ekerit Akuj anaberu kangina, nakaneni isurumi ngesi ekasechan.

²⁷Nugu kesi alimunit ayong eketataman atamar ayen a ngapei-pei, na esiakinea akingich eger a ngakiro.

²⁸Asak eger a ngakiro a ngache, nakaneni emam na ariamu. Alokiding ngikiliok abunget apei, abu engolik ekile epei lo itemokino erimae. Nakaneni alokiding ngaberu na atia nguna, emam tani apei na abu engolik, na itemokino erimae.

²⁹Daang na ayen ayong kesi nugu, atamar asubuni kolong Akuj ngitunga etenooko, nakaneni kesi ngikulepek etiliwosi eboyor kech loparing.