Read turkana Eketataman 9 Bible Online

Eketataman 9 - turkana bible

Eketataman 9

¹Abu etama ngakiro nugu daang lokojokon, sodi engolik atamar Akuj ngesi erikit ngitunga lukoosok ka lu etenooko, tani amina kech ka arem. Emam itwaan eyeni na esubakinosi ekisidi.

²Ikwaan daang.[5] Esal epei idarit lu etenooko ka lukasechak, luajokak ka luaronok, lu italeuno ka lu nyitaleuno, ngulu ipeyoenete ka lu nyipeyoenete. Emam ibore idwangitor itwaan niajokon ekasechan. Emam ibore idwangitor itwaan ni ikongit niche ni nyikongit.

³Erai esal kech kadaang epei. Eroko nguna noi ani eyakasi daang esubasi kane anakwap. Ngirwa daang lu eyareta ngitunga, ileleba aronis ka ngikerep nikech, sodi totoaka atipei.

⁴Nakaneni eyei ibore igieno itwaan cha daang ni eyari anakwap ana eyakasi ngitunga lu eyarete. Kainyo ejok iingok ni eyari akidwang engatuny lo etoanit.

⁵Eyenete lu eyarete atamar kitoaki, nakaneni emam ibore eyenete lu atoaka. Emam kesi nabo ainakinet ache kainyo emuriakis kolong kesi ngitunga.

⁶Amina kech, ka arem kech ta ekimue kech, erukosi daang ka kesi atoaka. Emam kesi nabo jik ekimar eyei anakiro kadaang ana esubasi kane anakwap.

⁷Kasio karika kimuj, akimuj kon a alakara. Tamat emuna kon talakar, kainyo ajoikis Akuj ngakiro na isubi iyong.

⁸Talakar jiik, toliwor itwaan ni elakuna ereet.

⁹Talakaros aapei ka aberu kon na imina iyong. Talakaros alorwa alupasiek kalu eringa Akuj kikachakinit nakwap. Talakar anakolongit kadaang ana erai pas, kainyo ibore iriamuni iyong alochan kon daang ngini.

¹⁰Ibore cha daang ni isaki iyong asubakin, tosub a ngikilinga kon kadaang. Kainyo emam etich, kori ngitamen, kori achwaanu ta aosou eyei lokatoak ni erai ngesi ilosi iyong.

¹¹Engolik nabo ibore iche, atamar kane anakwap, nyidwangeenete lukapiranak anakerit, nabo nyidwangeenete lukajwok alojie. Nyeriamuunete lukoosok akimuj nabo nyebareenete lukachwaak. Nyeinanakinio lukunonoi apolou alotich. Ichanyununosi ngitunga daang ka ekeny aronon.

¹²Emam itwaan eyeni atamar enangi esaa keng ori. Eger lo isurumere ngikieny a eloit, ka eger lo irumere ngikolea a epuute, eger ngolo ngesi kirumuneta ngoni naaronok pekiyeni atamar eponito.

¹³Eyei nabo akiroit ache na engolik ayong, na idodiunit eger lo emunotor ngitunga aosou kane anakwap.

¹⁴Ayei kolong ere lo adit lo akidioko ngitunga lu alomito. Abu ekapolon lotikajwon kitijik ere ngolo. Abu kisiriam ngasigerea keng, tasak akibwang ngawasea.

¹⁵Ayei itwaan neni ni arai ekebootonit, nakaneni aos ngesi noi adikino eyuuni ngitunga a ere kangolo. Nakaneni amam itwaan amisit ngesi.[6]

¹⁶Alimu ayong atamar ejok aosou idwangit ngikilinga. Tarai emam itwaan itamit ngakiro a ekebootonit alokooson, nabo nyiirario ngakiro keng.

¹⁷Ejok akiirar ngakiro a itwaan anikooson na elimuni iapakinit ekiruor akidwang akipup akirema a ekapolon alokiding ngikabangabangae.

¹⁸Ejok aosou akidwang ngiboro lujiet, nakaneni epedori ekasechan epei akinyasun naajokak nakaalak.