Read turkana Eeos Lokebusean Noi 1 Bible Online

Eeos Lokebusean Noi 1 - turkana bible

Eeos Lokebusean Noi 1

¹ Eeos lokebusean noi aloeosio kadaang. Erai eka Solomon.[1]

²Tonuakinae ayong a ngipon kon, kainyo ejok amina kon akidwang emuna.

³Ejok akukuny kon, ikwaan ekiro kon elimunio ka akimiet nakaakunyon na idokunitae. Nyisudete ngaberu daang kiminasi iyong!

⁴Torikoroe ayong atosiwa aapei, toliwor ekapolon kang anamaniyat kon. Kilakar ngoni aapei, ejoker echami a amina kon, idwangi na emuna. Nyisudete ngaberu daang kiminasi iyong!

⁵Ngaberu a Yerusalem, eriono ayong, nabo[2] ebus, eriono loger a ngieman alu eya nariet a Kedar, tarai ebus loger a ngawarui ana erapitere akai a ekapolon Solomon.

⁶Wara nyikimusiono kotere amuny kang, kainyo akolong ngesi kanomit. Kangoikinete talokaatokang ayong. Ketusuba ayong etich alomana a ngimusabib. Tongop ayong esaa lo asubakinea amana kang a ilope, katokuruwo asubakin akwaan kang.

⁷Tolimokinae kare, iyong lokamina, aliwae itwarari iyong ngamesekin kon adaka? Aliwae itowea iyong kesi lotingilan? Nyo niti kasakea ayong iyong losipaan a ngikeyokok aluche?

⁸Iyong nakebusean anaberu kadaang, ani pekiyeni, kikok ne, kape kiwapak ngakejen a ngamesekin kisirajak ngaanei kon diyete ngieman a ngikeyokok.

⁹Aminat kang, iminanari iyong ngikiliok loger lo eminanarea angole naberu lukiliok lu irito ngaurukukui a Parao.

¹⁰Isubusit asir ngamatengen kon, itojokit asir nakamilimilan emosiring kon.

¹¹Kisubakini sua iyong erikot a egolit, kitisiroe lokojokon a akwangat.

¹²Aperi ekapolon kang anamaniyat keng, tokukunyu akimiet kang awadaang.

¹³Ekukuny lominat kang loger a akimiet anakaakunyon na inapakinor kidiama ngisikin kang.

¹⁴Ikwaan lominat kang ka ngatur a amoni, na ekilikiluunito anamanat a ngimusabib ana eyakasi Engedi.

¹⁵Aminat kang, ibus iyong, enguraaka ngakonyen kon!

¹⁶Lominat kang, ijok iyong iteni, kiminarit iyong ayong! Nginyia lukalibak kesi eraakasi ekitanda yok.

¹⁷Ngakito a echekereng kesi eraakasi ngapirio a akai yok, ngadomou eraakasi ngalogoi a akai yok.