Read turkana Eeos Lokebusean Noi 2 Bible Online

Eeos Lokebusean Noi 2 - turkana bible

Eeos Lokebusean Noi 2

¹Ekoni ayong aturot a moding alo Charon, ekoni ngatur a esuguru alo a ngadipoe.

²Ikoni akone kang alokiding ngaberu nache ngatur a esuguru na engichakina lookwa.

³Lominat kang alokiding ngikiliok luche, ikwaan ka ekalale alokiding ngikito a amoni. Amina ayong akiboi alotorube keng, nabo kabobokinit ayong ageor keng.

⁴Karikori ngesi ayong kai na imujere kedodik ayong amina keng.

⁵Kisimwonoe a ngarinyo a ngimusabib, kisikwarunae a ngakalalio! Kainyo ketedekak ayong amina.

⁶Echolongit ayong akan keng na alokedieny, kelogakinite na aloteten.

⁷Kemaimai esi ngaberu a Yerusalem, kikongo a ngagetei ka ngigereoi lusorok, atamar nyikurukuruokinete esi amina kosi tanang ni itemokinor.

⁸Eira ayong etoil alominat kang. Ebunit, eporoporoe alomoru, ilamalamae ngimukur.

⁹Ikwaan lominat kang ka agete, kori egereo losorokit. Nyeye ewei alodiyete awas kosi, eripi tooma akai alopukei, itee anikoororon.

¹⁰Kesuruori ayong lominat kang. Tonyou robo aminat kang, akone kang, bua erukosi.

¹¹Adaun ngirwa lua akiporo. Adaun akiru.

¹²Akilikiluut ngatur anakwap. Anang ngirwa lua edonga. Epupio ngakurio eruosi anamanat.

¹³Akoko ngameyena. Akilikiluut ngamusabib esiakis akukunyuun. Tonyou robo aminat kang, akone kang, bua erukosi.

¹⁴Ikwaan iyong ka akuuri na edukit anachiet a ataaba. Kimiekinae engolik ereet kon, kimiekinae eira etoil kon, nabo ibus ereet kon.

¹⁵Kirumutu ngikweei, ngikweei luuchik, lu enyasut ngamanat kosi a ngimusabib ngamanat na akilikiluut.

¹⁶Erai lominat kang ekang, arai ayong akeng. Isirajakinit ngibaren keng esuguru lokaliban,

¹⁷tanang akolong imauni, sodi tongopia aribu. Tobongu, ekone kang, loger a agete kori a egereo alosorokit alomoru alungarab.[3]