Read turkana Eeos Lokebusean Noi 3 Bible Online

Eeos Lokebusean Noi 3 - turkana bible

Eeos Lokebusean Noi 3

¹Ani aperi alokitanda kang nakwaare, eruja asaki ngolo amina. Atasak ngesi, katongopik.

²Atolot erim ere, erim ngirotin ka nagielaru. Atasak ngolo amina. Atasak ngesi, katongopik.

³Kengolikis ngiketeok a ere erimit ere. Engit kesi atama, “Ingolikis esi lominat kang a?”

⁴Napei cha kitiakar ka kesi, eriamun ka ngesi. Atorwakin atowou alakakin, tanang arikori kai a itiokang, namaniyat na kolong kapotiunere ayong.

⁵Ekoe ngaberu a Yerusalem, kikongo kare a agete anakapiranan ka egereo losorokit, atamar nyikurukuruokinete esi amina kosi, tanang ni itemokinor.

⁶Nyoni ibore ngin ebunit anariet? Ikwaan ka apuru na edirisit, ekukunyuunito emitina ka ekinyaate, emitina lo egielanarete ngimuchurus.

⁷Kingolik, Solomon ngol ebunit! Iwokitae alokicholong keng alo apolou, ngasigerea ngatomwon-kapei iteete ngesi, ngasigerea nakajwok noi alo Isirael.

⁸Etingito daang ngilengea, ejwoko daang eyenikinitae alojie. Einikinit itwaan daang ekileng losiep, esadit akitijikin emoit nakwaare.

⁹Asubuni Solomon ekicholong keng lo a apolou, tosub a ngakito anaajokak a Lebanon.

¹⁰Ebutakinitae ngapirio keng akwangat, tarapae a awaru ana edonyokinitoe egolit. Erapitae nikibooyet a awaru anapus arengan, ana adonyunete ngaberu a Yerusalem elakara.

¹¹Ngaberu a Sion, potu kingolikisi ekapolon Solomon. Enapit ekiraun lo kolong abutokini itiokeng nakou, akolongit na eutar Solomon, akolongit na alakaror ngesi noi.