Read turkana Eeos Lokebusean Noi 4 Bible Online

Eeos Lokebusean Noi 4 - turkana bible

Eeos Lokebusean Noi 4

¹Irai iyong nakebusean, aminat kang! Enguraaka ngakonyen kon alotooma awaru na erapit ereet kon. Ibukeasi ngitim kon loger a esipanit a ngaanei alo ekokoriunit alomukur a Gilead.

²Ekwangak ngikel kon kea ikote ngamesekin na atubio ngajul, kilotarae. Emam lo iituno tani epei, etokokinitoe daang nikajokon.

³Ikote ngipon kon iuno niarengan, kiminarete na iruorikinea iyong. Imaunito ngamatengen kon loger a ngalam alotooma awaru na irapitor iyong ereet.

⁴Ikoni emosiring kon epem a Daudi, lo adukio kikachae ngiboro lujiet, ekodakinitae ngaupwala abunget apei.

⁵Ikote ngisikin kon ngigetei lumuu, ngigetei ngiarei lu edakasi esuguru lokaliban.

⁶Eboikin ayong lomukura a ekinyaate alokaakunyon, ka emukura a emitina, tanang imauni akolong, tongopia aribu.

⁷Ibus iyong noi, aminat kang, emam iyong ni ichwangakina!

⁸Aberu nakuuta kang, bua atorotokisi alomoru a Lebanon. Totiyaun alomoru alo enyaritae Amana, alomoru alobe Senir ka Erimon, ni eyakasi ngingatunyo ka ngirisae.

⁹Aminat a etau kang, nakuuta kang, ekienyiune kon, ka akoromwae kon na emosiring, kesupasi ayong.

¹⁰Ketalakarit ayong amina kon, aminat a etau kang, aberu kang nakuuta. Ebob amina kon idwangit emuna. Ekukuny epie kon idwangit ngikito lukaakunyok daang.

¹¹Ebobok ngipon kon ikwaan ka akimiet a ao, aberu kang nakuuta. Ikoni angajep kon anikang ngakile ka akimiet a ao. Eyei epie a Lebanon daang loworui kon.

¹²Aminat a etau kang, aberu kang nakuuta, erai amana na egolitoe, amana na edukitoe ngawasea, elelea lo enikenitoe,

¹³neni ekilikileta ngikito. Erupete loger a ngikito a ngalam, tokoniut ageor naajokon noi. Nyengopeenete ngikito lukaakunyok lu enyaritae ina ka nardo*g** kaneni,

¹⁴ka sapiron, ka kalamus, ka loongor-nyang itukukunyi akimuj ta auk daang a epie. Erupete ngikito a ngikinyaatei alukaakunyok ka echuchuka kaneni, ka ngamieta daang nakaakunyok noi.

¹⁵Ngileleae emasi amana, ngangololin na eleleete, ngayana na eleleunito alomoru a Lebanon.

¹⁶Tonyou, ekuwam lo alokwap, ekuwam lo alokuju, tokut mana kang, kitukukunyu akwap. Kimiek lominat kang tolomu mana keng, tanyam ageor naajokon noi.