Read turkana Eeos Lokebusean Noi 6 Bible Online

Eeos Lokebusean Noi 6 - turkana bible

Eeos Lokebusean Noi 6

¹Iyong aberu nakebusean noi anaberu, aliwae alot lominat kon? Tolimokinae sua erot lo etori lominat kon sodi engarakisi iyong akisak ngesi.

²Alot lominat kang mana keng, ni erupeta ta lokimieta. Isirajakinit ngesi esipanit keng alomana, tochuni ngaawata.

³Erai lominat kang ekang, arai ayong akeng. Isirajakinit ngesi esipanit keng aawat nakaliban.

⁴Aminat kang, ibus iyong ikwaan ka Yerusalem. Ijok iyong ikwaan ka ere a Tirisa. Imoitana ikwaan ka ngasigerea na etingito ngabenderae.

⁵Toree ngakonyen kon anikang, Kainyo ketoeam ayong! Ibukeasi ngitim kon loger a esipanit a ngaanei alo ekokoriunit alomukur a Gilead.

⁶Ekwangak ngikel kon kea ikote ngamesekin na elotar. Emam lo iituno tani epei, etokokinitoe daang nikajokon.

⁷Imaunito ngamatengen kon loger a ngalam alotooma awaru na irapitor ereet.

⁸Eyakasi ekapolon ngaberu ngatomwon-kapei, ka ngapesur a ngabwes ngatomwon-kauni, ta ngapesur na nyimarun.

⁹Nakaneni amina ayong apei bon, ibus ngesi ikwaan ka kuuri. Erai apei alokol a itiokeng, emina itiokeng ngesi noi. Ingolenakinete ngaberu daang ngesi kipuruut. Ngesi ipurosi ngaberu a ekapolon ka ngapesur keng a ngabwes.

¹⁰Ngae en, ekienyiununi loger a abaet? Ejok ngesi ikwaan ka elap, eparipari loger a akolong. Emoitana ikwaan ka ngasigerea na etingito ngabenderae.

¹¹Atiyaun ayong aloma mana a ngikito, akisemere ngikito luuchik anadipo, akingolikin ngakui nakiteat alomusabib ta ngikito a ngalam kepukiarito.

¹²Amarani ayong, kainyo kiinak iyong ayong ekimue a amina, loger a ekamean aurukuk a ejie, alo imuit akinang lojie.

¹³Kidongak, kidongak,[4] apese a akwap a Chulam, kidongak eteto. Nyo isaketa esi akitere ayong edongae loger lo iteere ngajorei ngaarei ejiete?