Read turkana Eeos Lokebusean Noi 7 Bible Online

Eeos Lokebusean Noi 7 - turkana bible

Eeos Lokebusean Noi 7

¹Irai iyong apese nakesuparan! Ejokak ngakejen kon enapito ngamuk. Eroouno ngipate kon loger a ibore ani esubunit ekunonoit.

²Ikoni akapul kon atubwa na nyengopeanakini emuna lo itodwaritae. Ikoni akook kon ngatuket a ngakanoi, na iriamit esuguru lokaliban.

³Ikwaan ngisikin kon ka ngimakatae lumuu, ikwaan ka ngigetei ngiarei.

⁴Ikoni emosiring kon akai na edirisit na edukitoe a ngikel a etom. Ikwaan ngakonyen kon ka ngabwelin na eyakasi lore a Echibon, diyete ekidor a ere aloapolon kangolo. Ejok ekume kon ikwaan ka akai na edirisit a Lebanon na ekienyikinit ere a Damasko.

⁵Ikeara akou kon ikwaan ka emoru a Karimel. Emalimalete ngitim kon loger a ngisul. Itililimiyori akibuseanu kech ekapolon.

⁶Irai iyong nakaminaran, nakebusean, iyong naminat, kitalakari amina kon!

⁷Irai iyong nakebusean loger a eengol. Ikwaan ngisikin kon ka ngasab a eengol.

⁸Adokari ayong loongol atoger. Ikote ngisikin kon anikang ngasab a ngamusabib, ekukuny akianga kon loger a ngakalalio.

⁹Ikwaan akituk kon ka emuna loajokon. Kimiek robo jik emuna tolelek lominat kang, tolelek lopon keng ka ngikel[5] keng.

¹⁰Arai ayong aka eminat kang, nabo aminarit ayong ngesi.

¹¹Bua, ekone kang, kapana naroatin, kapana atopero nadakarin.

¹²Kinyouni ngoni nataparach elilim esemoto ngimusabib, engolikisi chene kerupunito, kepukiarito ngatur, engolikisi ngikito a ngalam kepukiarito, kainakini ayong iyong amina kang kaina.

¹³Kinguu akukuny a ngigilae,[6] eyei ageor naajokon daang diyete ekidor yok. Ekone kang, kedekinit naajokak daang, nangorok ka nakiteat.