Read turkana Isaya 10 Bible Online

Isaya 10 - turkana bible

Isaya 10

¹Oitiakoi! Abe etioko nginyas ianyunete esi! Esi lu irokete ngitalio lu nyeriyan lukichiakiaret ngitunga kang.

²Kotere erot ngolo, kitedepasi ngikebootok na eriyan, ka akimik ngitunga lukebootok na iyookino. Sodi todemareta ngapuseru ka ngikokiok ngiboro kech.

³Ikokinete esi ai akolongit na eriras? Ikokinete esi ai akolongit na eyaunea Akuj eriras anakwap anakalonan? Imatarosi esi nika ngae kingarak? Aliwae iweeta esi ebari kus?

⁴Emam na isubakinete esi pearai arabanikin ka ngirikon wapei, kori aarakino lojie. Tani kikok neni, eringa angoit a Ekapolon Akuj nyedauna, eringa enyoikinit akirirare ngitunga.

⁵ Tolim Ekapolon Akuj tama, “Asiria! Asiria erai esebo a angoit kang, ka aburo a anyunyura kang.

⁶Amearit ayong kesi lotunga lu nyemunosi Akuj, lotunga luketongoito ayong. Amearit ayong kesi akidem ka akoko ta akipudare ngitunga loger a apua alorotin.”

⁷Nakaneni esaki ekapolon a Asiria asubakin naaronok na erai ngakeng a ilope. Esaki amunyar ngakwapea nakaalak.

⁸Kainyo iwoga ebala, “Eraakasi ngikarikok a ngasigerea kang ngikapolok!

⁹Alemari ayong ere a Kalino loger lokolong alemarea lo a Karikemich. Atolema ere a Amas, loger lokolong alemarea lo a Aripad. Atolema lo a Samaria loger lokolong alemarea lo a Damasko.

¹⁰Ani kalemarit ayong ngapolosio na ilipito ngakujo nasubuna, ngakujo nakaalak akidwang na Yerusalem ka Samaria.

¹¹Enyasu ayong Samaria ka ngakujo keng nasubuna daang, nabo asubakini napei nguna ani a Yerusalem ka ngakisikwaanet na ilipitae kaina.”

¹²Na erumorea Ekapolon etich keng daang alomoru a Sion ka Yerusalem, irirae ngesi ekapolon a Asiria kotere ekiwog lo inisar ngesi

¹³ebala, “Asubak daang kotere ngikilinga kang. Agogong ayong, nabo aos atochwaana. Alema ayong ngikukuorin lu etiakito ngitunga sodi atolema ebari kech. Epuda ayong ngikapolok kech loger a emong.

¹⁴Ekote ngibukui anakwap ngakais a ngikieny, atochunak ayong ebari kech loger lo echunakinea itwaan ngabeyei. Emam tani ipei kech ni ipukupukokini abeben keratak ayong, kori emam ni erukini keteriangak ayong!”

¹⁵Nakaneni ebala Ekapolon Akuj, “Epedori aep atamar apolot akidwang itwaan ni etingit a? Epedori egirigir akinisa akidwang itwaan ni etubio a? Nyepedori aburo akikear itwaan, itwaan ngesi ikeari aburo!”

¹⁶Kotere nguna, Akuj Namerikanyer, eyauni edeke kirira ngasigerea keng na egogong. Emini akim na erirae nawat kech.

¹⁷Akuj, na erai akicha a Isirael eliwor akim, Akuj a Isirael na italeuno, eliwor asarae, na emunyari ibore daang tani ngiikwa ka ngirega a akolongit a apei.

¹⁸Ngamon ka ngamanat nakebuseak inyasunio lokojokon, loger lo inyasunea edeke itwaan.

¹⁹Ekidiekuunete ngikito lu idongete, epedori tani ikoku akimarun.

²⁰Ngirwa ngulu, Ngisirael lupiyayek, nyigienokinosi nabo ngitunga lu adikino emunyarete kesi. Igienokinosi kesi dir Ekapolon Akuj, na erai Akuj a Isirael na italeuno.

²¹Ngisirael ngidikidio lu idongete, ebongunete nia Akuj kech anakaagongon.

²²Tani tokona kelalak Ngisirael loger a asinyen ana eyei lokwaas a anam, ngidikidio make kesi ebongunete. Idarit ngitunga amunyaro, na itemokino eanyunete.

²³ Ee robo, eyauni Akuj Namerikanyer nginyas nakwap daang, loger lokolong alimunio.

²⁴Ebala Ekapolon Akuj Namerikanyer, “Ngitunga kang, lu ilomito Sion, nyieam ngitunga a Asiria, tani bo kiboliatar esi loger lokolong a Ngimisiri.

²⁵Wadiochichi idongit, tadaun eriras kang anikus, sodi atomunya ayong kesi.

²⁶Ayong Ekapolon Akuj Namerikanyer, edesi kesi a akulit kang loger lokolong edesea ngitunga a Midian Anataaba a Oreb. Erirae ayong Ngisiria loger lo eriraa Ngimisiri.

²⁷Ani enangi ngirwa ngulu, kalachakini ayong esi anapolou a Asiria, nyeepotier eegos kech alosegeta kus nabo jik.”

²⁸Alemasi ngasigerea a ngimoe ere a Ai.[13] Etorut kesi Migiron. Aisikis eegos kech alo Mikimach.

²⁹Ekalama kesi apak, ngikaperok Geba nakwaare. Abul ngitunga a ere a Rama, amatarosi ngitunga a Gibea alo erai ere a Saul.

³⁰Ngitunga a Galim, kiremasi! Ngitunga a Laich, topupokisi! Ngitunga a Anasos, tachalutu!

³¹Amatarosi ngitunga a Madimena ka lua Gebim, esakete ayuun.

³²Akolongit naga eyakasi ngimoe lore a Nob, imanito emoru a Sion lo eyei lore a Yerusalem.

³³Etubori Ekapolon Akuj Namerikanyer kesi loger a ngaten ana etubunio alokitoe. Etiyauni ngesi lu inisasi ka lu iwogasi kisurum ngileech.

³⁴Iteli Ekapolon Akuj kesi loger a ngikito aluuchik alu itelio a aep anamoni, loger lo itelere ngikito luajokak a Lebanon!