Read turkana Isaya 11 Bible Online

Isaya 11 - turkana bible

Isaya 11

¹ Imineauni ateni anatorom a Daudi, erupuni ateni ngina anakuruas keng.

²Emini etau a Ekapolon Akuj nikeng, nak aosou ka achwaanu, etau a arere ngakiro ka ationis, etau lo eyenea ka akiker Ekapolon Akuj,

³tojoik ngesi akiker a Ekapolon Akuj, nyetubi ngesi ngakiro kotere nguna itee kori nguna epupi.

⁴ Pearai etubi ngakiro alukebootok eriyan sodi toik lupalag. Erami ngesi ngitunga a eriras a akituk keng, sodi totoka luaronok.

⁵Enapi ngesi ateneanut loger lo enapitere aruba anaabor, tanap amuno loger lo enapitere aruba anachir.

⁶ Iboikinosi ngipeei ka ngamesekin wapei, eurienikinosi eris ka ikale wapei. Edakasi ngitak a ngaatuk ka lua ngingatunyo aapei, kiyok ikoku niichi kesi daang.

⁷Edakasi ngaatuk ka ngibuin aapei, tourienikinos ngitak kech wapei. Edakasi ngingatunyo nginyia loger a ngaatuk.

⁸Eboliakini ikoku alodiyete akai a emun, irepakini ikoku akan kai a akipom, nakaneni nyekonyio.

⁹ Sion lo erai emoru a Akuj nyemini ibore nikawanan kori niaronon. Ilelebun ayenut na eyenere Ekapolon Akuj nakwap, loger lo ilelebakatar ngakipi nanamea.

¹⁰Ebuni akolongit na eliworor ekapolon lokitetet lo itorunit nalesea a Daudi, emachar alobukui. Echunarosi ngibukui nikeng kidodikis arimatoi.

¹¹ Na enangea akolongit ngina, ebuuni Ekapolon a agogongu keng ngitunga keng lu idongito Asiria, ka Misiri, ka Pasiros, ka Kuch,*g** ka Elam, ka Babilonia, ka Amas, ka ngikwaasea a nganamea ta ngikwarin, tobuu a agogongu keng.

¹²Ikeari Ekapolon Akuj apendera na eliwor abendera lo idodikini ngibukui atamar echuni ngesi nabo ngitunga a Isirael ka lua Yuda lu epetara, tobuu kesi alowaitin kadaang a akwap.

¹³Edaun etereku a Isirael, inyasunio amoitanut a Yuda. Nyeringa Isirael etingi etereku kotere Yuda, nyeringa Yuda eliwor emoit a Isirael.

¹⁴Imorikinosi aapei kitijikis Ngipilisti alo too, toremo ngitunga lua kide. Idwangete kesi Edom ka Moab, kiwapa Ngiamon ngakiro kech.

¹⁵ Itooni Ekapolon Akuj apas a Sues, Itukutuni ekuwam lokariran kitoon angolol a Eupurate, sodi kimiek ngingololin ngikan-kaarei lu epedori itwaan daang akikalam.

¹⁶Emini erukudi loapolon lo epudunere alo Asiria, lo itorete ngitunga keng Ngisirael lupiyayek, loger lokolong kata apaakech na apudunioto alo Misiri.