Read turkana Isaya 13 Bible Online

Isaya 13 - turkana bible

Isaya 13

¹Araakasi nugu ngakiro na adwario kotere Babilon na edodikini Akuj Isaya lokookeng a Amos.

² Kikeasi abendera a ejie alomukura alo erai alaireng! Kikeasi ngasigerea akituk kikeasi akan sodi tanyarauneta kesi tolomuneta lodorin a ere alokenisan kangolo.

³Ebala Ekapolon Akuj kona, “Ayong ilope adungok luseuna kang, anyarau ngikajwok kang lumaseniko, kinisaka, sodi kirirata ngitunga lu angoikinit ayong.”

⁴Topupokisi echale alomoru, echale a ajore anatikaalan! Echale a ngibukui ka ngapolosio echunasi! Akuj Nadmerikanyer itonyounit ngasigerea keng lojie.

⁵Eponito anakwapea anakalonak, anasalunet a akwap. Enyounit Ekapolon Akuj akinyasun akwap daang a angoit keng.

⁶ Toowanikisi iriabasi! Kainyo aapuu akolongit a Ekapolon Akuj, akolongit na eyaunea Akuj Naationon nginyas.

⁷Isaalikini ngakan a ngitunga kadaang, ebuli ngitunga daang kipirisaar ngitai.

⁸Ebuli ngitunga lokojokon, toupia nikaapilan ngawat, loger a apipilu a aberu ana eriaba akidoun. Ekienyanakinosi ngitunga make iilit, tatakanu atamar irumito ngileech.

⁹Ebunit akolongit a Ekapolon Akuj, akolongit nakamoitanan, a anyunyura keng ka angoit. Inyasuni akwap toliwor alaireng, tomunyarae ngikasechak lu eyakasi nakwap.

¹⁰ Ngikanyer daang a adis ejongoote akicha. Eribokini akolong napei ipiripiruunea, ejongoe elap akicha.

¹¹Ebala Ekapolon Akuj, “Ayauni ayong ngakiro naaronok nakwap erira ngitunga luaronok daang kotere ngasechesea kech. Etiditeuni ayong daang lu inisasi sodi erira daang lu iwogasi ka lu emoitaka.

¹²Etiliwori ayong ngitunga lu echiching akidwang egolit loasegan. Ee robo, echichinguunete akidwang egolit a Opir.

¹³Kotere anyunyura kang, ayong Akuj Namerikanyer, akolongit na angoitor ayong noi ngina, etamaranikini adis, etirikirikok akwap kiyotok ani eyei.

¹⁴“Ngitunga a ngakwapea anache lu eyakasi Babilon, ematarosi nakwapea kech, topetaros loger a ngagetei ana ematara alokerikak, kori loger a ngamesekin ana emam ekeyokon.

¹⁵Itwaan ni eanyunio daang, ichumio topele ekileng kayaaye, nicha eanyunio daang, eario.

¹⁶Ipudaario ngide kech totoka anakonyen kech, tokokoae ngawiyei kech, totikoonoroe ngaberu kech.”

¹⁷Ebala Ekapolon Akuj, “Echichiunit ayong ngitunga a Medes kitijikis Babilon, ngitunga lu nyesakete ngaropiyae, ngitunga lu nyeminari egolit.

¹⁸Earete kesi ngisorok a ngimalea a amod. Nyitimi kesi akiar ngide lu enakete, nyisieniyete kesi ngide.

¹⁹ Babilonia ibus anapolosio kadaang, inisatar ngitunga keng. Nakaneni ayong Ekapolon Akuj, ebelukwaari Babilon loger lokolong ebelukwaarea Sodom ka Gomora.

²⁰Emam itwaan elomi neni nabo jik. Emam Emwaarabut lo ewowoot lo igurori eam keng kaneni. Emam ekeyokon eramari ngibaren keng tadaka neni.

²¹ Eliwor neni ni elomito ngitieng a moding, ka ni edukito ta tula ngakais kech. Elomete ngikaleeso neni kichuro ngatirikiki kaneni.

²²Ngakais kech na edirisito ilelebun erue a ngibuin aluongora. Iirario ngikweei eruosi anakais a ngikapolok kech. Anang esaa a Babilon! Edikino ngirwa keng edaun.”