Read turkana Isaya 14 Bible Online

Isaya 14 - turkana bible

Isaya 14

¹Isieniyete Ekapolon Akuj Ngisirael nabo, sodi toseu kesi tarata ngikeng a ilope. Ebuari kesi nakwap kech, pot ngitunga a ngakwapea anache kiruko ka kesi kaneni.

²Ingarakinete ngibukui lukaalak Ngisirael tobongut nakwap nakolong ainakini Ekapolon Akuj kesi, sodi tarata ngibukui ngikedalak kech kaneni. Ngitunga lukolong arikorito Ngisirael, eliworosi tokona ngirikon a Ngisirael. Epolokinete Ngisirael ngitunga lukolong echiakiarito kesi.

³Ngisirael, akolongit na kisiangarea esi Ekapolon Akuj anaboliaro, ka apipilu, ka etich lo kidesikinitae,

⁴ikianatar esi ekapolon a Babilon toeonokis kona, “Adakar ekapolon lokamoitanan, nyeringa ichiakiari itwaan iche nabo jik.

⁵Eala Ekapolon Akuj ngikilinga a ngikapolok aluaronok, asalu agogongu na epolokinitotor kesi.

⁶Echiakiarito kesi ngitunga a amoitanut, toboliatar jik ngibukui lu edwangete.

⁷Eanga tokona akwap daang eliling, eeo itwaan daang imaritete.

⁸Elakarosi ngidomou ka ngichekereng a Lebanon, kotere ekapolon lo adakar, ebalasi, ‘Kona tokona atoanea ngesi, emam itwaan eringa kitubi ngoni!’

⁹Ikurukuruokin nia ngikatoak akisiriam ekapolon a Babilon ebuni. Enyounete ngikaram akimalare ngesi, ka daang lukolong araakasi ngikarikok a akwap. Daang lukolong araakasi ngikapolok a akwap, enyounete alokicholongo kech a apolou

¹⁰Isuruorikinete daang ngesi ebalasi, ‘Ipalagag iyong dang loger kosi! Ikwaanikin iyong ka sua!’

¹¹Atiyaun ekipur kon anangu lokatoak aapei ka erue a ngaburucho ana kieonokinere iyong. Inapakin iyong lojemu lo a ngikur, kimukokin eworu lo a ngikur.

¹² Ekapolon a Babilon, etop lo a ataparach lokariran, ichakun iyong anadis! Idwangeene kolong iyong ngibukui, nyelo tokona kichakun kwap.

¹³Itameene kolong iyong alotau kon ibala, ‘Adoki kidiama nadis, ewaak ekicholong a apolou kang yaaye ngikanyer lukalonak, eboikin kidiama emoru lo alokwap yege, ni iriameenete ngakujo.

¹⁴Adokari ayong epor ngidowon, atoliwor lo Apol Noi.’

¹⁵Nakaneni iyong tokona logo kitiyaun lokatoak, nakipany nakooyen noi.

¹⁶Kikienyikinete iyong ngikatoak nikooyen iumwokinito, sodi kingitas tamasi, ‘Itwaan en dir ngesi nikolong etamarani akwap ka ngapolosio a?

¹⁷Ngesi lokolong enyasuni ngirerea kiloch akwap toliwor ariet a? Ngesi lokolong pealachanakini ngitunga lu eenitae kori peemianakini tani toloto nawiyei a?’

¹⁸Eperete ngikapolok luche a ngakwapin daang analielin kech ana apolou,

¹⁹nakaneni emam iyong aliel, achakar akwaan kon tobos. Etikito ngawat alu kolong aario alojie, kitachakakin iyong ka kesi napanya a ngatabab, kipudae kaneni.

²⁰Aloger inyasunea iyong akwap kon, taar ngitunga kon a ilope, nyikinukio iyong a arimatoi loger a ngikapolok aluche. Emam ngitunga lukaronok a awi kon lu epuunosi.

²¹Isiakini tokona aaranot! Etoakete ngide a ekapolon kalo kotere ngasechesea kata apaakech. Emam tani ipei kech ni epolokini akwap.”

²²Alimu Ekapolon Akuj kona, “Anyoikini ayong Babilon etijik sodi enyasu. Emam ibore aisikini ayong, nyaisikini ngide kori ngitunga epuunosi. Alimu ayong Ekapolon Akuj nguna.

²³Etiliwori ayong Babilon ngayengiyengea a ngakipi, toliwor ta tula elomito neni. Ekisari ayong ibore dang alo Babilon enyasu. Alimu ayong Akuj Namerikanyer nguna.”

²⁴ Ekong Akuj Namerikanyer, ebala, “Nguna arekinit ayong kesi esubakinosi. Nguna asaki ayong asubakin, kesi esubakinosi.

²⁵Amunyari ayong ngitunga a Asiria alo Isirael ana erai akwap kang, epudae ayong kesi alokidiama ngimoru kang. Alachakini ayong ngitunga anakito a Ngisiria ana eenitere ngimosiringan kech. Alemari ayong eegos lo inuit ngitunga kang.

²⁶Ngakiro nguna kesi arekinit ayong kotere akwap daang etia ni etia. Anyoikini ayong akirirare ngibukui daang.”

²⁷Akuj Namerikanyer ngesi asak asubakin nguna. Ngae iriwokin kiratak? Anyoiki ngesi akirirare ngitunga. Ngae itopegi?

²⁸ Ekaru lo atonea Ekapolon Aas, apon todwarae ngakiro nugu.

²⁹Ebala Ekapolon Akuj kona, “Ee ngitunga a Pilistia, warasi nyiilakarosi tamasi be abila aburo nakolong kidesere esi. Na etoanea emun, tolunyun akipom. Ngabeyei a akipom, ebekunete emun lo eseleta.

³⁰Imwokete ngide lu ekingaren a ngikebootok, iboikinosi kesi akaalimon. Nakaneni esi Ngipilisti, kaari ayong esi a akoro, ani ngitunga kus lu epuunosi, ataar.

³¹Esi ngirerea a Ngipilisti daang, kiuteto. Kikaloutu toema! Kainyo einiuna edou a apua alokwap, eraakasi daang ngasigerea na emam tani apei kech na ekuriana.”

³²Anukiro kitachakini ngoni ngitunga lu emeunitae alo Pilistia? Kilimokini kesi kona, “Etowo Ekapolon Akuj Sion esikokin, nabo ngulu eboliare, ematarosi neni toyuunos.”