Read turkana Isaya 16 Bible Online

Isaya 16 - turkana bible

Isaya 16

¹Ainasi ngitunga a Moab ekapolon lo eyei Yerusalem imesek ni emekinito, anyounete alo Sela kitorut nariet.

²Ewowooto ngitunga a Moab alodoketa kadaang a angolol a Arinon, loger a ngitak a ngikieny alu ipudunitoe anakais kech.

³Alimokis kesi ngitunga a Yuda kona, “Ekoe, kisuruoroe sua niajokon, tosubere nguna eriyan, kimukoe sua a etorube loger a ekitoe alo erapit akolong. Kipeyounoe sua kainyo kidokinit anakwap kosi, nyikilimosi kare.

⁴Kimiekinae eboikinos nakwap kus. Kiyokoi ani eyakasi ngulu esakete amunyar sua.” (Ngirwa lu erotokinio ekaboliaran, ani edaun ngichan lu esakere amunyar, ngirwa lu engopea itwaan ni eyaunit ekurikur nakwap,

⁵ngirwa ngulu, eliwor epei a ngalesea a Daudi ekapolon, epolokini ngesi ngitunga kotere amuno ka amina. Nyitoweyi ngesi asubakin na iyookino, nabo totubeene ngakiro eriyan.)

⁶Ebalasi ngitunga a Yuda kona, “Kiira sua ngakiro a ekinis a Moab. Kiyen eger lo iwogar ka abenyo keng, nakaneni erai akiojo ngina daang pas”

⁷Ikalounete ngitunga a Moab kotere akwap kech. Ikalounete ani eitunioto ngamugati ka ngarinyo a ngamusabib nakolong anyamete alo Kir Eres.

⁸Enyasun ngamanat a Echibon ka ngimusabib a Sibima. Atubosi ngikapolok a ngibukui ngaten kotere emuna. Anangito kolong ngimusabib ngulu lore a Yaser, ani alo kide tananga nariet. Ani alo too, todokasi ekwakaye anam a Amakat.

⁹Tokona bocha egoro ayong kotere ngimusabib a Sibima loger lo egoror kotere lua Yaser. Alakakinit ayong ngakiyo kotere Echibon ka Eleale, kainyo nyeringa nabo ekare iirario ani emamakatar ngalemet nakitalakarete.

¹⁰Emam tokona alakara kori ekare eyei namanat naketurupak ngikinyam. Emam ngieosio eeoi anamanat a ngimusabib, emam akirema epupio. Emam itwaan idichi ngamusabib a emuna. Asalu ekare.[14]

¹¹Egoro ayong akunua kotere Moab, egoro ealolongi kotere Kir Eres.

¹²Ituburuna ngitunga a Moab pas edokete kidiama akilip, kori elomete nakais kech na ilipeta kainyo nyechamunio ngakilipasinei kech.

¹³Ngakiro nguna kesi kolong alimuni Ekapolon Akuj kotere Moab.

¹⁴Ebala tokona Ekapolon Akuj, “Adaunet a ngikaru a nguuni, engopiari ebari a Moab. Tani kelalak ngitunga keng, ekidioko lu idongete, nabo eliworosi lupalag.”