Read turkana Isaya 17 Bible Online

Isaya 17 - turkana bible

Isaya 17

¹Ngakiro nugu kesi adwario kotere Damasko. Ebala Ekapolon Akuj kona, “Nyeringa Damasko eliwor ere nabo, eliwor asakatan a nginyas.

²Eramakinio alorerea a Siria jik.[15] Eliworosi ni edakasi ngisipaan, nabo emam itwaan ikilakini kesi kaneni.

³ Engopikini Isirael ni eyuunor, edaun apolou a Damasko. Ngitunga a Siria lu idongete eyarete irumete ngileech loger a Ngisirael alu idongete eyarete. Alimu ayong Akuj Namerikanyer nguna.”

⁴Alimuni Ekapolon Akuj kona, “Ebuni akolongit na edaunor ekipur a Isirael, kiloch ebari kech toliwor eboot.

⁵Ikokini Isirael amana na etubunio ngakies a ngimomwa tolemae. Ikokini amana na itao sodi kideparae ibore daang anadipo a Repaim.

⁶Ngitunga ngidikidio idongete eyarete, ikokini Isirael ekitoe a akimiet, lo ageror ageor keng daang, kidong ngaarei kori ngauni nateni na alokidiama, kidong ngoomwon kori ngakan nateni nache. Alimu ayong Ekapolon Akuj na arai Akuj a Isirael na etaleuno nguna.”

⁷Ani enangi akolongit ngina, itamunete ngitunga Akasubunan kech na erai Akuj a Isirael na italeuno. Ilipete ngesi esakete kingarak.

⁸Nyeringa nabo igienokinosi ngikenoi a ngakipeyos lukolong asubete kesi ngikulepek, kori nyeringa igienokinosi etich a ngakan kech, lo erai akisikwaanet a akuj anaberu enyaritae Achera, ka ngikenoi lukinomet emitina.

⁹Ani enangi akolongit ngina, eramakinio alorerea alu edukitoe ngawasea, sodi kimiekinae inyasuna loger a ngirerea alu kolong aisikinete Ngiipi, ka Ngiamor[16] na amatarotor ani a Ngisirael

¹⁰Isirael, kimuriak iyong Akuj nakiyuununi, na ikoni ataaba na idukea iyong toyuunor. Kotere nguna, tani kitata esi ngikinyam luajokak tolemikis akuj nagela,[17]

¹¹tani keruput kiealasi akolongit napei ngina, engopiarete ngalemet kus. Akolongit ngina, epete ngichan make, ka apipilu na nyitedekuun.

¹²Kiira erue a ejie a ngakwapea anakaalak, eruo loger a anam ana ekulae, loger a erue a ngitoroi alu ekulaate ananam.

¹³Ijukuna ngakwapea loger a ngakipi ana ibiruno lokojokon. Nakaneni ikilakini Akuj kesi tamataros nikalonan. Ekutario nikalonan loger a ngatunyeny ana ekusi ekuwam alomoru, ekutario loger a apua ana eyei lokuwam lo edirisit.

¹⁴Eyaunete kesi ebuloi ebong, ani nataparach tongopiarito! Nguna eraakasi atachanot a ngulu kirumiarito ngoni ka ademar ebari yok.