Read turkana Isaya 19 Bible Online

Isaya 19 - turkana bible

Isaya 19

¹ Ngakiro nugu kesi adwario kotere Misiri. Ebunit Ekapolon Akuj Misiri, ebunit edokit edou lo ibiruno. Emaranete ngakujo nasubuna a Misiri alongaren Ekapolon Akuj, ebulit ngitunga a Misiri daang ipirisaara ngitai.

²Ebala Ekapolon Akuj kona, “Echuchukini ayong Ngimisiri tojwoto kesi make. Itijikini ere epei, kitijik loche, nabo enyoikini ekapolon epei tonyoik loche.

³Ekurukuruokini ayong ngakiro na ereto Ngimisiri daang ka ekileenu kech. Ematarosi ngakujo kech nasubuna tamataros lokaram ka ngimurok esakete akingarakino.

⁴Ewaakini ayong Ngimisiri nakan a ekapolon alokamoitanan, epolokini kesi ekapolon lokaadengan. Alimu ayong Ekapolon Akuj Namerikanyer nguna.”

⁵Ekidiekuunete ngakipi a angolol a Nili, iyosi akijuar jik.

⁶Ebosete ngiporotoi a angolol, kijuasi ngayana keng tooko. Ebosiarete nginyia daang ka atiriwae lu eyakasi lokwaasea a angolol.

⁷Idongete ngikwaasea a angolol a Nili elapat. Ngikinyam lu itakinio daang eokete tokutarae nikalonan.

⁸Ikalounete ngikechiemak daang tosutonokis, kainyo aliworosi ngikorobicho ka ngipuutei kech ngika pas.

⁹Ngulu edonyete ngiworui lukaanikak, ka lu etokete epamba, elungakinosi.

¹⁰Ngikarikok a akwap lu eyenikinitae, emunyario, daang lu igiritae eraakasi ngikunonoe a ngitichisio, ialolongete.

¹¹Ebangaaka ngikarikok a ere a Soan! Ngikasukou a Parao lukoosok alo Misiri, iruorosi ngakiro nabaang! Epedorete kesi kwaai alimokin Parao tamasi, “Kirai sua ngide a ngikoosok, kirai ngide a ngikapolok alungorok.”

¹²Kasio robo Parao, nyaalu tokona ngikasukou kon lukoosok ngulu? Kimiek kitolimokis iyong ngakiro na esaki Akuj Namerikanyer, asubakinea Misiri.

¹³Ebangaaka ngikarikok a Soan, ingalatae ngikarikok a Mempis. Ngikarikok a ngitela lu eyenikinitae kesi etooliyosi Misiri.

¹⁴Itilimuni Ekapolon Akuj kesi ngakiro na eyaunete ekurikur, sodi kiteroterokin Misiri anakiro keng kadaang, loger a itwaan ani irakarit epurot, ani iterotero toleki.

¹⁵Emam itwaan tani ipei alo Misiri, kerai ekarikon kori itwaan pas, kerai ekabaran kori ekebootonit, ni epedori akingarakin.

¹⁶Enangi akolongit na ekuriakearotor ngitunga a Misiri loger a ngaberu. Ebuli kesi tamaranikis na ingolikineta Akuj Namerikanyer enyoikini kesi kirira.

¹⁷Eemete Ngimisiri akwap a Yuda. Napei cha elimunere ekiro be Yuda, eemete Ngimisiri daang kotere ngakiro na esaki Ekapolon Akuj asubakinea kesi.

¹⁸Ani enangi ngirwa ngulu, ngabukui a Ngaeburaniae ngesi ianete ngitunga alorerea a ngikan alo Misiri. Ikongete ngitunga a ngirerea kangulu tamasi kimunokini Akuj Namerikanyer. Enyarao epei a ngirerea kangulu, “Ere a Akolong.”

¹⁹Ngirwa ngulu, emini ekeno a ngakipeyos a Ekapolon Akuj kiding akwap a Misiri, ani apir a amoru na italeunitoe kotere ngesi, emini lokukuoru a Misiri.

²⁰Eliworosi ekeno ka apir emachar lo elimori atamar eyei Akuj Namerikanyer Misiri. Ani keboliare ngitunga kaneni, sodi kikaloikis Ekapolon Akuj, emeuni ngesi ekayuunan lo elachuni kesi.

²¹Idodiun Ekapolon Akuj alotunga a Misiri, sodi tolimosi Ngimisiri ngesi, kilipa ka alemikin ngakipeyos na inomio ka ngadekon. Nabo ikongete kesi ani a Akuj, sodi kirichakis ngakiro na ekongete.

²²Irirae Ekapolon Akuj Ngimisiri, ani nabo kitangalek kesi. Ebongokinete kesi ngesi sodi kiira ngesi ngakilipasinei kech, kitangalek.

²³Ngirwa ngulu, emini erot loapolon napei alo Misiri tanang Asiria. Erotokini itwaan a Asiria toloma Misiri, torotok Emisirit toloma Asiria, sodi kilipa Ngimisiri ka ngitunga a Asiria aapei.

²⁴Ngirwa ngulu, etupakinosi Isirael, ka Misiri ta Asiria, tarata ngakwapea nauni nguna apiaro anakwap kadaang.

²⁵Epiari Akuj Namerikanyer kesi tama, “Apiari ayong Ngimisiri lu eraakasi ngitunga kang, apiari Asiria lukolong asubuni ayong ta Isirael lu eraakasi ngitunga kang luseuna.”