Read turkana Isaya 2 Bible Online

Isaya 2 - turkana bible

Isaya 2

¹Akiroit naga ngesi ainakini Ekapolon Akuj Isaya lokookeng a Amos, kotere Yuda ka Yerusalem.

²Alorwa alu isidiunosi, emoru lo ewaar akai a Akuj ngesi eoyaar alomoru kadaang, ilengi ngimukur daang. Eropuunete ngibukui daang neni.

³ Epote ngitunga lukaalak tamasi, “Potu apana moru a Ekapolon Akuj,[1] kai a Akuj a Isirael. Kitatamikini ngesi ngoni ngakiro na esaki atosuba. Ewapa ngirotin lu aseu ngesi. Isuruori ngesi ngitunga keng alo Yerusalem, kainyo ebunit etal a Ekapolon Akuj alo Sion.”

⁴Etubi ngesi ngakiro a ngibukui totiakuunu ngakiro a ngitunga alukaalak, itiakete kesi ngilengea kech luapolok tarata ngirokonin. Kitiliwosi ngakwaaras kech ngilengea luiriet ngikito. Nyeringa nabo jik ngibukui engaarete ajore kori nyenyounete alosit lojie nabo.

⁵Tokona bocha, ngalesea a Yakobo, potu atoloto anakicha a Ekapolon Akuj.

⁶Ee Akuj, inger iyong ngitunga kon, lu eraakasi ngalesea a Yakobo! Kainyo elelebun ngimurok nakwap, eponito kesi alo kide. Elelebun ngikadwarak lu ikote Ngipilisti. Emorikinosi kesi ka ngitunga a ngakwapin anache.

⁷Ileleba akwap kech ngakwangae ka egolit. Nyimarun ebari kech. Ileleba ngangolei nakwap kech. Nyimarun ngaurukukui kech na irito ngangolei.

⁸Ileleba akwap kech ngakujo nasubuna, Ilipito kesi ngiboro lu asubunete a ngakan kech, ngiboro lu ayeunete ngimoyo kech.

⁹ Etingete itwaan daang ngileech ka etimoi. Tochoite irimakini, ee Ekapolon Akuj!

¹⁰Elomarete natabab toduka anaburiburio, sodi toyuunotor anangopit a Ekapolon Akuj ka akwangis a apolou keng.

¹¹Ebunit akolongit na elemarere ngiwog a ngitunga sodi kinyasunae ekinis kech. Akolongit ngina, Ekapolon Akuj bon ipuruunio.

¹²Akolongit ngina, itiditeuni Ekapolon Akuj daang lu iwogasi ka lu inisasi ta daang lu iparaparasi.

¹³Inyasuni ngesi ngichekereng a Lebanon lukooyak daang ta ngichokei a Bachan daang.

¹⁴Irieriakini ngimoru ka ngimukur talapatata,

¹⁵ka ngakais na edirisito daang ta ngawasea a ngirerea alu eyuunere.

¹⁶Iibakini ngatubwae naapolok ajokak daang nakipi.

¹⁷Ikisario ekiwog a ngitunga, esaluni ekinis kech. Akolongit ngina, Ekapolon Akuj bon ipuruunio.

¹⁸Engopiarete ngakujo nasubuna jik.

¹⁹Elomarete ngitunga naburiburio a ngatabab, toboka ngapanya nalup tolomasi sodi toyuunotor anangoit a Ekapolon Akuj, ka akwangis a apolou keng, na ebunio ngesi akitamaranikin akwap.

²⁰Na enangea akolongit ngina, echakarete ngitunga ngakujo kech na esubunitae anakwangae ka egolit, nakolong asubunete kesi kilipa. Echakarete lorunyei ka nika ta lononwa.

²¹Na ebunio Ekapolon Akuj akitamaranikin akwap, edukete ngitunga anapanya ka ngaburiburio a ngatabab sodi toyuunotor anangoit a Ekapolon Akuj ka akiduk anakwangis a apolou keng.

²²Totiaakisi ibore be itwaan, ni edaun akianga keng, erai ngesi nyo ajokon?