Read turkana Isaya 20 Bible Online

Isaya 20 - turkana bible

Isaya 20

¹Ekaru lo amearea ekapolon a Asiria lo anyaritae Sarigon, tomea ekarikon loapolon a ngasigerea akitijikin ka alemar Achidod,

²ngirwa ngulu, alimuni Ekapolon Akuj ngakiro kisitoru nia Isaya lokookeng a Amos, ebala, “Kape talacha egunia lo inapit iyong anaabor ngolo, nabo tobuto ngamuk na eyakasi nakejen kon.” Tosubak Isaya nguna, sodi tolot emuner toturi.

³Ani elemario Achidod, tolim Ekapolon Akuj tama, “Alot ekasuban etich kang Isaya emuner toturi a ngikaru a nguuni. Erai ibore ngini idodiunit ngakiro na moi esubakinere Misiri ka Kuch.

⁴Erikori ekapolon a Asiria ngirikon a ngakwapea anaarei kanguna, luuchik ka luapolok, toriko daang emuner toturete, emam ibore erapit ngiwosiwos! Erai ngileech ani a Misiri.

⁵Iumwokinete ngulu igienosi Kuch kinisatar Misiri, tadaun akigieno kech.

⁶Ngirwa ngulu, elimunete ngitunga lu elomito lokwaas a anam a akwap a Pilistia tamasi, ‘Wae! Anukiro nugu asubakin alotunga alu ngoon kigieno atamar kesi kiyokiyete alokapolon a Asiria! Kikokini tokona ngoni kipuun ai?’ ”