Read turkana Isaya 21 Bible Online

Isaya 21 - turkana bible

Isaya 21

¹Ngakiro nugu kesi adwario kotere Babilon. Epote ngakiro naaronok anakwap anaketubulon, loger a ekuwam aloapolon alo edirisit nariet.

²Kedodikin ayong ngakiro naketubulok, erubakinit ekademan edemi, erubakinit ekenyasan inyasi. Ee ngasigerea a Elam, kitijikisi! Ee ngasigerea a Media, kiriama ngirerea! Etubori Akuj aboliaro daang na ayauni Babilon.

³Ngakiro na engolikini ayong ka akiirar anakitoodikinet kangina, ketubul ayong noi kapipilikis loger a aberu ana epipilikinit ariaba. Ketukuruwo apipilu tani akiirar, ketukuruwo ebuloi tani akingolikin.

⁴Ebukakin akou kang, kaupia ebuloi akwaan. Edarit atabong naajokon nakaneni emam nakainu pearai ebuloi.

⁵Engolik ekimuje esubakinitae, apetakin ngawarui na iboikinotor ngipeyok. Imujete kesi tamaase. Atipei eirar anyaranot ebala, “Ngikapolok! Tolemutu ngaupwala kus!”

⁶Ani erumor katolimok Ekapolon ayong tama, “Kape kiwaak itwaan niketeon, tolimok atamar tolimo ngakiro na ingolikini daang.

⁷Ani kingolik ngitunga edokito ngangolei eloose a ngaarei-rei, ani kingolik ngitunga edokito ngisikiria ka ngikaala, ejoikinit ngesi iseme lokojokon.”

⁸Irema eketeon ebala, “Ekapolon, awo ayong alowae kang akwaar ka apaaran.”

⁹ Kingolik, nyelu adolut! Edokito ngangolei a ngaarei-rei. Alimo eketeon ngakiro ebala, “Aukor Babilon! Ngakujo nasubuna daang nakolong elipitae, abwang achakakin nalup.”

¹⁰Ee Ngisirael, lu iraakasi ngitunga kang, kidaun esi loger a ngakanoi. Kalimok tokona ayong esi ngakiro naajokak na eirari ayong ani a Ekapolon Akuj Namerikanyer, ana erai Akuj a Isirael.

¹¹Ngakiro nugu kesi adwario kotere Edom. Kanyarit itwaan alo Edom, “Nyaai eketeon, wori edaunor akwaar? Iwalari wori?”

¹²Atatachu ayong atama, “Ebunit ataparach, nakaneni ebuni akwaar dang. Ani kisaki iyong akingita nabo, kape tobongu kingis.”

¹³Ngakiro nugu kesi adwario kotere Arabia. Esi ngitunga a Dedan, Esi lu iwoose anarieta a Arabia.

¹⁴Esi ngitunga lu ilomito Tema, Kitamata ka akisumuj lu edokinito.

¹⁵Edokinito kesi anakwaaras ana esakete akiar kesi. Edokinito alomalea a amod alu esakete akigum kesi. Edokinito alokurikur a ejie.

¹⁶Ani erumor katolimok Ekapolon ayong tama, “Adaunet a ekaru a epei, edaun ekipur a Kedar daang.

¹⁷Ngikagumak a ngimalea a amod kesi ejwoko alotunga a Kedar, nakaneni tani ngulu, ekidiekuunete lu idongete. Alimu ayong Ekapolon Akuj na arai Akuj a Isirael nguna.”