Read turkana Isaya 22 Bible Online

Isaya 22 - turkana bible

Isaya 22

¹Ngakiro nugu kesi adwario kotere Adipo a Ngakitoodikinet. Anukiro nugu? Nyo idokaritotor esi daang naitae a ngakais kus?

²Nyo ichalatar esi? Eka inyo ekichur? Kotere nyo eyakar ekare lore? Ngitunga kus lu atoka, pearakinio lojie, kori peajiete kesi taarae.

³Amatarosi ngikarikok kus daang, sodi kirumunae eringa nyegumara tani emal epei a amod.

⁴Kimiekinae tokona ayong egor ariaba, kotere ngitunga kang lu amunyar, warasi nyiisak akisililing ayong.

⁵Erai akolongit naga aka ebuloi, ka ekurikur ta ngibiler Anadipo a Ngakitoodikinet. Ekapolon Akuj Namerikanyer ngesi kiinu ngoni ngakiro nguna daang. Aukor ngawasea a ere yok, ikamete ngimukur ngitoilio a ngitunga alu igorosi esakete akingarakino.

⁶Apote ngasigerea anakwap a Elam edokito ngangolei, totingito ngakawa ka ngimalea. Egangakinito ngasigerea a akwap a Kir ngaupwala kech.

⁷Ngadipoe naajokak a akwap a Yuda, kilelebun ngaurukukui a ejie, torekinos ngasigerea na adokito ngangolei lodorin a Yerusalem.

⁸Alema Ekapolon Akuj ibore ni eyuuni Yuda daang. Akolongit ngina, igienosi esi ngiboro lujiet lu ayakasi kai a Amoni.

⁹Naingolikineta esi ngapedon a ngawasea a Yerusalem atamar elalak, ipot esi toloto tooko ngakipi na akar ana alokwap.

¹⁰Kimarut esi ngakais na ayakasi Yerusalem, dio toyatasi epewae sodi toriamuneta ngamoru na idukioto awas nabo.

¹¹Todukokis esi ekipor lo ikamuni ngakipi na eleleunito anakar anangorot. Nakaneni nyemisikina esi Akuj, nakolong arekini ngakiro nguna daang kolong a angorot sodi tosubakinotor.

¹²Ngirwa ngulu, Ekapolon Akuj Namerikanyer asaki esi kigoro tosutonokis, toluro ka akinap ngiguniae.

¹³ Nakaneni akidwang esi asubakin nguna, ipot esi talakaros kimariteteto, tongola ngimongin ka ngimesekin, tanyama akiring, tamata emuna. Tamasi, “Emuja, atamata, kainyo kitoaki moi.”

¹⁴Ekapolon Akuj Namerikanyer kedodik ayong ebala, “Iteni nyerimakinio kesi jik kotere akisech naga tanang akolongit na etoaketa. Alimu ayong Ekapolon Akuj Namerikanyer nguna.”

¹⁵Kalimokini Ekapolon Akuj Namerikanyer ayong atamar atolot nia Chebina, alo aweikinit awi a Ekapolon, atolimok kona,

¹⁶“Nyo kon eyei nege? Ngae kon eyei nege, ibokakinitor iyong aliel kon natabab na akook a emukura?

¹⁷Tani kesibit iyong eya ngikilinga, kikopuni Ekapolon Akuj iyong kimasa nikalonan.

¹⁸Kilemuni ngesi iyong kisirimok loger a epira, sodi kibaariyo nakwap nabalany. Totoan kaina alokiding ngaurukukui kon na ejie na inisar iyong. Iyau iyong ngileech nawi a ekapolon kon.

¹⁹Kilemari Ekapolon Akuj iyong alotich kon, sodi kitotiyau anapolou kon.”

²⁰Tolimok Ekapolon Akuj Chebina kona, “Akolongit na esubakinotor ngakiro nguna, aomuni ayong ekasuban etich kang Eliakim, lokookeng a Ilikia.

²¹Etanapi ayong ngesi eworu kon lo a etich, ka aruba, sodi ainak apolou daang nangoon itingit iyong. Ikokini ngesi apakeng a ngitunga a Yerusalem ka Yuda.

²²Ariongakin ayong loseget keng engaet a apolou a ekapolon Daudi. Ngesi etingi engaet a apolou. Ngakiro na engaari ngesi, emam itwaan egoli. Nguna egoli ngesi, emam itwaan engaari.

²³ Etirokini ayong Eliakim loger a apir, sodi toliwor ngesi ekapolon lo erimae anawi a Daudi alo erai apakeng.

²⁴“Nakaneni eliworosi ngiyenet keng daang eegos anikeng. Igienokinosi daang ngesi, luapolok ka luuchik. Itiri ngesi ngakiro daang naachik ka naapolok.

²⁵Nakaneni akolongit na eliworor Eliakim lopalag, losek ekoni apir na etirokina, eolokoki sodi toukor. Tasalu eboyor a ngakiro kadaang ana kolong etirit ngesi. Alimu ayong Akuj Namerikanyer nguna.”